Aziýa Kubogy – 2027-niň saýlama tapgyryndaky birinji duşuşygyny myhmançylykda geçiren ýygyndy toparymyz Hytaý Taýpeýiniň ýygyndy toparyndan 2:1 hasabynda üstün çykdy. Gaosýun şäheriniň “National Stadium” stadionynda geçirilen duşuşykda ýygyndy toparymyza ýeňiş getiren toplary Elman Tagaýew (48-nji minut) bilen Ýazgylyç Gurbanow (83-nji minut) öz atlaryna ýazdyrdylar. Bu toparçanyň beýleki duşuşygynda Tailandyň milli ýygyndysy öz meýdanynda Şri-Lankanyň ýygyndy toparyndan 1:0 hasabynda üstün çykdy.

Ýeri gelende bellesek, “D” toparçada bäsleşýän Türkmenistanyň milli ýygyndy toparynyň Aziýa Kubogy – 2027-niň saýlama tapgyryndaky garşydaşlarynyň Tailandyň, Hytaý Taýpeýiniň hem-de Şri-Lankanyň milli ýygyndylarydygyny bellemek gerek.

Türkmenistanyň milli ýygyndy topary saýlama tapgyryndaky ikinji duşuşygyny öz meýdanynda Tailandyň ýygyndy toparynyň garşysyna geçirer. Bu duşuşyk 10-njy iýunda paýtagtymyzda geçiriler.

Çeşme: Türkmenistanyň Futbol Federasiýasy