Türkmenistan sporty ösdürmek boýunça Arkadagly Gahryman Serdarymyzyň ýolbaşçylygynda möhüm işleri durmuşa geçirýär. Sportyň ähli görnüşlerini ösdürmek ýurdumyzyň sport syýasatynyň iň esasy ugrudyr. Türkmen sportynyň futbol görnüşinde gazanylýan üstünlikler hem bu ulgam boýunça amala aşyrylýan işleriň aýdyň beýanydyr. Türkmen futbolynyň ösüşinde uly orun eýeleýän taryhy uly toparlaryň biri hem “Şagadam” futbol toparydyr. Bu topar 1949-njy ýylda Türkmenbaşy (öňki Krasnowodsk) şäherinde ýerleşýän Nebiti gaýtadan işleýän zawodlar toplumy tarapyndan esaslandyryldy. Topar irki döwürde ýaryşlara “Neftýanik” hem-de 1992-1993-nji ýyllarda “Hazar” atlary bilen gatnaşdy. Şol döwürlerde hem topar bu atlary bilen köpsanly üstünlere ýetmegi başardy.
1993-nji ýylyň awgust aýyndan başlap häzirki wagta çenli bu topar Türkmenistanyň çägindäki we halkara ýaryşlara “Şagadam” ady bilen gatnaşýar. Türkmenbaşynyň Nebiti gaýtadan işleýän zawodlar toplumynyň “Şagadam” futbol topary Balkan welaýatynyň Türkmenbaşy şäheriniň D.Azady köçesiniň “Şagadam” stadionynda ýerleşýär. Öýdäki oýunlaryny “Şagadam” stadionynda kabul edýär. Türkmenbaşynyň Nebiti gaýtadan işleýän zawodlar toplumynyň “Şagadam” futbol toparynda ýaşlardan we ýetginjeklerden ybarat 10 futbol topary bar.
2017-nji ýylda Türkmenbaşynyň Nebiti gaýtadan işleýän zawodlar toplumynyň “Şagadam” futbol toparyna Türkmenistanyň at gazanan tälimçileri Annamyradow Seýdullamyrat Gulanmyradowiç, Klimenko Aleksandr Ýewgenýewiç we Kurbanmamedow Rahim Muhamedowiç dagylaryň gelmegi bilen toparda uly özgertmeler boldy. Topar 2017-nji ýyldan şu güne çenli her ýylky Türkmenistanyň çempionatynda we Kubok ýaryşlarynda hormatly baýraklaryň eýesi boldy. Bu gazanylan ýeňişler toparyň halkara abraýyny hem artdyrdy.
Türkmenbaşynyň Nebiti gaýtadan işleýän zawodlar toplumynyň “Şagadam” futbol topary dürli ýyllarda hormatly baýraklary gazanmagy başardy. Topar “Neftýanik” ady bilen çykyş eden döwründe, ýagny, 1949-1991-nji ýyllarda 7 gezek Çempion we 5 gezek Kubogyň eýesi bolmagy başardy. “Şagadam” futbol topary ady bilen çykyş edip başlandan soňra bolsa 2002-nji ýylda Türkmenistanyň Çempiony, 2007 we 2021-nji ýyllarda Türkmenistanyň Kubogynyň eýesi, 2002, 2015, 2017-nji ýyllarda Türkmenistanyň Kubogy ýaryşynyň finalçysy, 2003, 2014, 2017, 2019-njy ýyllarda Türkmenistanyň çempionatynyň bürünç medalynyň eýesi boldy.
Türkmenbaşynyň Nebiti gaýtadan işleýän zawodlar toplumynyň “Şagadam” futbol topary Türkmenistanyň taryhynda welaýatlardan ilkinji bolup, ýagny 2002-nji ýylda Ismailow Kudrat Rahimowiçiň bäş tälimçiliginde Türkmenistanyň çempiony adyna mynasyp bolmagy başardy. Bu Türkmenistanyň futbolynda ilkinji gazanylan beýik üstünlikleriň biridir.
Türkmenbaşynyň Nebiti gaýtadan işleýän zawodlar toplumynyň “Şagadam” futbol toparynyň düzüminde çykyş edip, Türkmenistanyň Ýokary ligasy ýaryşynyň netijesi boýunça “Türkmenistanyň iň netijeli hüjümçisi” adyna mynasyp bolan futbolçylar hem sanardan köpdür. 2002-nji ýylda Sadykow Rustam (20 gol); 2012-nji ýylda Boliýan Aleksandr (23 gol); 2014-nji ýylda Karadanow Mämmedaly (28 gol) bu hormatly ada mynasyp boldurlar.
“Şagadam” futbol toparynyň gazanan bu beýik üstünlikleri ýurdumyzda futboly ösdürmekde alnyp barylýan döwlet syýasatynyň üstünliklere beslenýändiginiň belent subutnamasydyr.
