Hormatly Prezidentimiziň bimöçber aladalary bilen türkmen sporty ösýär we dünýä jemgyýetçiliginiň belent ykrarnamasyna eýe bolýar. Ýurdumyzda sportyň ähli görnüşleri bilen bilelikde futboly ösdürmekde hem düýpli işler dowam etdirilýär. Türkmenistanyň Futbol Federasiýasynyň alyp barýan işleri türkmen futbolyny has ösdürmäge we dünýä tanatmaga güýçli itergi berýär. Türkmenistanyň futbol çempionatynyň toparlary görkezýän üstünlikli netijeleri bilen türkmen sportynyň halkara abraýyny has berkitýär. Şol üstünlikli çykyş edýän toparlaryň biri-de “Türkmennebit” döwlet konserniniň “Türkmennebitönümleri” Baş müdirliginiň “Ahal” futbol topary bolup durýar. Ahal welaýatynyň Änew şäherinde ýerleşýän we 1989-njy ýylda döredilen topar türkmen futbolynyň öňdebaryjylarynyň biri bolmak bilen, Aziýa sebitinde gurnalýan halkara ýaryşlarynyň yzygiderli gatnaşyjysydyr.
"Ahal" futbol topary 1989-1991-nji ýyllar aralygynda SSSR-iň çempionatynyň ikinji ligasynda çykyş edip başlady. 1992-nji ýyldan şu güne çenli bolsa Türkmenistanyň Ýokary ligasynda çykyş etmekligini dowam etdirip gelýär. 2013-nji ýylda "Ahal" futbol topary ýokary derejeli netijeler gazanyp, Ali Gurbaniniň tälimçilik etmekliginde ilki Türkmenistanyň Futbol Federasiýasynyň kubogyny we şol ýylyň içinde Türkmenistanyň Kubogy-2013 atly ýaryşynyň kubogyny gazanmagy başardy. Bu toparynyň taryhynda ýatdan çykmajak möwsümleriň biri boldy. 2014-nji ýylyň möwsümini "Ahal" futbol topary Türkmenistanyň naýbaşy kubogyny gazanmak bilen başlady. Şol ýylyň oktýabr aýynda baş tälimçi Ali Gurbaniniň ornuna Guwançmuhammet Öwekow bellenildi. Bu tälimçiniň ýolbaşçylygynda “Ahal” futbol topary ikinji möwsüm yzygiderli Türkmenistanyň kubogyny gazandy we Türkmenistanyň çempionatynyň bürünç medalynyň eýesi bolmaklygy başardy.
"Ahal" futbol toparynyň üstünlikleri ýylsaýyn artmaga dowam etdi. 2015-nji ýylda “Ahal” futbol topary AFK-nyň kubogy halkara ýaryşyna Bişkek şäheriniň “Dordoý” toparyndan üstün çykmaklyk bilen başlady. Ikinji saýlama tapgyrynda araplaryň “Fandja” toparyny ýeňmeklik bilen ýaryşyň toparlaýyn tapgyrynda çykyş etmekligi gazandy. Bu toparyň halkara ýaryşlarda gazanan iň uly netijeleriniň biri bolup durýar. 2015-nji ýylyň sentýabr aýynda Guwançmuhammet Öwekowyň öz islegi boýunça wezipeden gitmekligi bilen, Baş tälimçi wezipesine Boris Grigorýans bellenildi. Täze tälimçi hem topara köpsanly üstünlikleri gazandyrmagy başardy.
Dürli ýyllarda toparyň Baş tälimçisi wezipesinde köpsanly tejribeli tälimçiler zähmet çekdi. 2016-2019-njy ýyllarda Röwşen Meredow, 2019-2020-nji ýyllarda Said Saýidow, 2021-nji ýylda Hojaahmet Arazow, 2022-nji ýylda Mergen Orazow dagylar işlediler. Mergen Orazowyň baş tälimçilgi astynda “Ahal” futbol topary 2022-nji ýylda Türkmenistan çempionlygyny taryhynda ilkinji gezek gazandy.
2023-nji ýylyň ýanwar aýyndan häzirki güne çenli toparyň baş tälimçisi wezipesinde Serdar Geldiýew zähmet çekýär.
Şeýle-de “Ahal” futbol topary “AFK-nyň çempionlar ligasy 2023” atly halkara ýaryşynyň toparlaýyn tapgyranda ilkinji gezek çykyş eden topardyr. “Ahal” futbol klubynyň ähli üstünlikleri “Türkmennebitönümleri” baş müdirliginiň hemaýatkärligi we goldawy esasynda amala aşyrylýar. "Ahal" futbol toparynyň gazanan bu üstünlikleri ýurdumyzyň sport abraýyny has dabaralandyrýar
