Türkmenistanyň futbol boýunça 20 ýaşa çenli ýaşlardan ybarat bolan ýygyndysy Aziýanyň kubogy ― 2025-iň saýlama tapgyryndaky duşuşyklarynyň öňüsyrasyndaky okuw-türgenleşik ýygnanyşygyny geçirmek üçin Özbegistan Respublikasyna gitdi. Baş tälimçi Döwletmyrat Annaýew bu ýygnanyşyk we saýlama duşuşyklar üçin 24 futbolçyny ýygyndy topara çagyrdy. Olar «ARKADAG», «Ahal», «Aşgabat», «Merw», «Şagadam» we «Altyn Täç» toparlaryna wekilçilik edýärler.

Türkmen futbolçylarynyň Özbegistandaky türgenleşikleri 23-nji sentýabra çenli dowam eder. Soňra ýygyndy toparymyz bu ýerden Gyrgyz Respublikasyna ugrar. Mälim bolşy ýaly, türkmen ýygyndysy geljek ýylyň 6 ― 23-nji fewraly aralygynda Hytaý Halk Respublikasynda geçiriljek Aziýanyň kubogynyň saýlama tapgyrynyň duşuşyklaryny Gyrgyz Respublikasynda geçirer. Bije çekişligiň netijesinde «I» toparça wekilçilik eden türkmen ýygyndysy saýlama tapgyrdaky ilkinji duşuşygyny şu ýylyň 25-nji sentýabrynda Ýaponiýanyň ýaşlar ýygyndysy bilen geçirer. Biziň ildeşlerimiziň 27-nji sentýabrdaky garşydaşy bolsa Gyrgyzystanyň ýygyndysy bolar. Döwletmyrat Annaýewiň şägirtleri saýlama tapgyrdaky jemleýji duşuşygyny 29-njy sentýabr güni Mýanmanyň ýygyndysy bilen geçirer.

Aziýanyň kubogy ― 2025-e yklymdan 16 ýygyndy gatnaşyp biler. Bu bolsa türkmen ýygyndysynyň toparçada birinji orny eýelän ýagdaýynda yklym ýaryşynyň final tapgyryna gatnaşmaga hukuk gazanjakdygyny görkezýär.

Çeşme: Türkmenistanyň Futbol Federasiýasy