Ýurdumyzyň futbol çempionatynyň 30-njy tapgyrynyň wagty süýşürilen duşuşygynda 17-nji dekabrda «Altyn Asyr» öz meýdanynda «Ahal» toparyny kabul etdi. Oýunda ýer eýeleri 1:0 hasabynda ýeňiş gazandy.

Gyzykly geçen oýunda ýeňiş gazanan toparyň goluny duşuşygyň 21-nji minutynda Röwşengeldi Halmämmedow geçirdi. Ikinji orny wagtyndan öň «Ahal» topary 67 utuk bilen eýelän bolsa, «Altyn Asyr» topary 59 utuk bilen çempionatda üçünji orunda ýerleşýär.

Ýeri gelende ýatlatsak, Türkmenistanyň futbol çempionatynyň doly jemlenmegi üçin ýene-de iki duşuşyk geçiriler. Bu duşuşyklarda «Aşgabat» – «Altyn Asyr» (31-nji tapgyryň senesi süýşürilen duşuşygy) hem-de «Altyn Asyr» – «Köpetdag» (32-nji tapgyryň senesi süýşürilen duşuşygy) toparlary güýç synanyşarlar.