Türkmenistanyň Nebitgaz senagaty we geologiýa işgärleriniň güni mynasybetli Balkanabat şäherinde ýerleşýän “Sport toplumy” stadionynyň ýanaşyk futbol meýdanynda Türkmenistanyň Futbol federasiýasy bilen “Nebitçi” futbol klubunyň bilelikde guramagynda halypa futbolçylaryň hem-de žurnalistleriň gatnaşmagynda Balkan welaýatynyň hem-de Aşgabat şäheriniň ýygyndy toparlarynyň arasynda kiçi-futbol boýunça ýoldaşlyk duşuşygy geçirildi. Balkanabat şäherinde geçirilen dabara ýerli futbol hünärmenleri bilen birlikde Türkmenistanyň Futbol federasiýasynyň ýolbaşçylar düzümi hem gatnaşdy.

Baýramçylyk äheňinde geçen duşuşyk 3:3 hasabynda tamamlandy. Balkan welaýatynyň ýygyndy toparynyň düzüminde Azat Garajaýew hem-de 2 gol bilen Ýewgeniý Tkaçenko tapawutlanan bolsa, paýtagtymyzyň ýygyndy toparynyň gollarynyň 2-sini Nazar Baýramow, beýlekisini bolsa Wladimir Baýramow öz atlaryna ýazdyrdylar.

Ýeri gelende bellesek, Balkan welaýatynyň hem-de Aşgabat şäheriniň ýygyndy toparlarynyň düzümlerinde öz döwründe netije görkezen ýurdumyzyň halypa futbolçylarydyr sport žurnalistleriniň çykyş edendiklerini bellemek gerek.

Geçirilen bu duşuşykda Balkan welaýatynyň ýygyndy toparynyň düzüminde Jumadurdy Meredow, Meret Saparow (derwezeçi), Gurbanmämmet Meredow, Azat Garajaýew, Ýewgeniý Tkaçenko, Gurbanmyrat Gündogdyýew, Annaesen Meňliýew (derwezeçi), Hojaahmet Arazow, Öregeldi Kowusow, Goçguly Goçgulyýew, Wýaçeslaw Sudarew, Ajimirza Gasanow ýaly türkmen futbolunyň taryhynda mynasyp yz goýan oýunçylar çykyş eden bolsa, paýtagtymyzyň ýygyndy toparynyň düzüminde doganlar Wladimir we Nazar Baýramowlar, Amandurdy Annadurdyýew, Wladimir Miller, Serdar Garajaýew, Gurbangeldi Durdyýew, Rahym Waliýew, Boris Borowik, Annanur Gulow dagy çykyş etdi. Paýtagtymyzyň ýygyndy toparynyň derwezesini ýurdumyzyň milli ýygyndysynyň öňki derwezeçisi Baýramnyýaz Berdiýew gorady.

Ýeri gelende bellesek, Türkmenistanyň futbol çempionatynyň Ýokary ligasyna gatnaşýan “Nebitçi” toparynyň edara binasynyň açylyş dabarasy hem şu güne gabat geldi.