20–29-njy iýuly aralygynda Türkmenbaşy şäherinde Balkan welaýatynyň toparlarynyň arasynda futzal boýunça «Deňizçi» kubogy ugrundaky ýaryş geçirildi.

Ýaryş Balkan welaýatynyň Futbol federasiýasy, Türkmenbaşy Halkara deňiz porty we «Deňizçi» futzal topary tarapyndan bilelikde guraldy. Sport çäresi «Deňizçi» futzal toparynyň döredilmeginiň 15 ýyllygyna bagyşlanyp geçirildi.

«Deňizçi» kubogy ugrunda geçirilen ýaryşa Türkmenbaşy şäheriniň we Balkan welaýatynyň döwlet edaralarynyň, iri kärhanalarynyň, sport guramalarynyň we hususy kompaniýalaryň wekillerinden ybarat toparlar gatnaşdylar. Olaryň hatarynda:

1. «Deňizçi» — Türkmenbaşy Halkara deňiz portunyň Türkmenistanyň milli futzal ligasynda çykyş edýän topary;
2. «Gorag gullugy» — Türkmenbaşy Halkara deňiz portunyň işgärlerinden düzülen topar;
3. «Gadamly» — «Balkan» gämi gurluşyk we abatlaýyş zawodynyň topary;
4. «TNGZIT» — Türkmenbaşydaky nebiti gaýtadan işleýän zawodlar toplumynyň topary;
5. «Serhetçi» — Türkmenistanyň Döwlet serhet gullugynyň Türkmenbaşy şäherindäki degişli bölüminiň topary;
6. «Ýaşlyk» — Balkan welaýatynyň sport ulgamynyň ýaşlar topary;
7. «Altyn Asyr» — Türkmenbaşy şäherindäki aragatnaşyk kärhanalarynyň topary;
8. «PETRONAS» — «PETRONAS Çarigali (Türkmenistan) Sdn Bhd» kompaniýasynyň topary;
9. «At-Abraý» — «At-Abraý» ulag-logistika kompaniýasynyň topary çykyş etdi.

Toparlar ýokary sport taýýarlygyny, ýeňşe bolan erki we toparlaýyn agzybirligi görkezdiler.

Ýaryşyň jemleýji duşuşygy 29-njy iýulda «Deňizçi» bilen «At-Abraý» toparlarynyň arasynda geçirilip, onda «Deňizçi» topary garşydaşyny 2:1 hasabynda ýeňmegi başardy.

Üçünji orun ugrunda Türkmenbaşydaky nebiti gaýtadan işleýän zawodlar toplumynyň topary bilen «Serhetçi» topary duşuşdylar. Şeýlelikde, Türkmenbaşydaky nebiti gaýtadan işleýän zawodlar toplumynyň topary üçünji orun eýeledi.

Ýaryşyň jemleri boýunça ýeňijileri sylaglamak çäresi geçirildi.