24-nji iýunda futbol boýunça Türkmenistanyň birinjiliginiň nobatdaky duşuşyklary geçirildi. Bu oýun güni geçirilen toplara örän baý boldy — geçirilen dört duşuşykda toparlar 19 top geçirmegi başardylar.

«Merw» — «Arkadag» — 0:5

Ýaryşyň lideri Maryda garşydaşyny ynamly ýeňdi: Ýaryşda ýeňiş gazanmaga esasy dalaşgärleriň biri bolan «Arkadag» topary Mary şäheriniň baş meýdançasynda «Merwiň» goragyny derbi-dagyn etdi. Myhmanlar eýýäm duşuşygyň birinji ýarymynda üç sany jogapsyz top geçirip, oýnuň ykbalyny çözdüler. Oýnuň ikinji ýarymynda bolsa olar hasaby has-da artdyrdylar.

• Geçirilen toplar: Begenç Akmämmedow (17), Didar Durdyýew (21), Daýanç Meredow (38), Baýram Ataýew (56), Diýargylyç Orazow (62).

   

«Nebitçi» — «Ahal» — 2:5

Balkanabatda geçirilen toplaryň baýramçylygy: Günüň iň köp top geçirilen duşuşygy Balkanabatda boldy. «Ahal» topary Süleýman Mirzoýewiň 11-nji minuda çenli geçiren iki topy bilen oýna güýçli badalga berdi. «Nebitçi» oýnuň ikinji ýarymynda garşylyk görkezmäge synanyşsa hem, myhmanlaryň hüjümini saklap bilmedi. Ýeňijileriň düzüminde Magtymberdi Berenow hem iki top geçirmegi başardy.

• Geçirilen toplar: Seýitmämmet Hojamämmedow (48), Hydyr Agöýliýew (89) — Süleýman Mirzoýew (3, 11), Magtymberdi Berenow (40, 69), Ýakupmuhammet Gowşudow (58).

   

«Köpetdag» — «Şagadam» — 2:2

Duýduryşlara baý bolan gyzgalaňly deňlik: Günüň ýeke-täk deňme-deň tamamlanan oýny Aşgabatda geçdi. «Köpetdag» hasaby açan hem bolsa, netijede yzda galmaly boldy. Paýtagtyň toparyna hasapdaky netijäni 77-nji minutda Musaguly Zorjikowyň geçiren topunyň saýasynda üýtgetmek başartdy. Oýun örän çekeleşikli häsiýetde geçdi: duşuşygyň baş emini oýunçylara we myhmanlaryň tälimçisi Gurbangeldi Durdyýewe jemi 10 sany duýduryş berdi.

• Geçirilen toplar: Emir Berdiýew (22), Musaguly Zorjikow (77) — Guwanç Weliýew (43), Resul Mahmydow (61).

   

«Aşgabat» — «Altyn Asyr» — 0:3

«Aragatnaşykçylaryň» tejribesi paýtagtly toparlaryň çaknyşygynda rüstem geldi: Büzmeýin etrabynyň sport toplumynda geçirilen paýtagtly toparlaryň çaknyşygynda «Altyn Asyr» özüniň artykmaçlygyny subut etdi. Topar oýnuň dowamynda güýjüni ýerlikli paýlap, ynamly ýeňiş gazandy.

• Geçirilen toplar: Bagtyýar Gürgenow (10), Weýisgeldi Orazdurdyýew (39), Myrat Öwezmyradow (48).

   

Tapgyryň netijeleri sanlarda:

• Geçirilen toplar: 19
• Iň uly hasaply ýeňiş: «Arkadag» (5:0).