6-njy maýda futbol boýunça Türkmenistanyň Kubogyny almak ugrunda ýaryşyň çärýek final tapgyrynyň ilkinji duşuşyklary geçirildi. Dört garşylaşykda jemi 20 gol geçirildi.

Tapgyryň ilkinji duşuşygy Türkmenbaşy şäherindäki «Şagadam» stadionynda geçirildi. Bu ýerde «Şagadam» topary öz meýdanynda 0:1 hasaby bilen «Köpetdag» tarapyndan ýeňlişe sezewar edildi. Duşuşykdaky ýeke-täk goly 54-nji minutda Emir Berdiýew geçirdi.

Aşgabat şäheriniň Büzmeýin etrabyndaky stadionda geçirilen duşuşykda «Altyn Asyr» topary «Aşgabat» toparyny 6:1 hasaby bilen ynamly ýeňdi. Bu oýnuň baş gahrymany het-trik eden Begençmyrat Myradow boldy. Ol 7-nji, 29-njy we 77-nji minutlarda tapawutlanmagy başardy. Şeýle-de «Altyn Asyryň» düzüminden Röwşengeldi Halmämmedow, Mekan Aşyrow we Resul Röwşenmyradow hem gollary bilen tapawutlandy. «Aşgabat» toparynyň ýeke-täk goluny 64-nji minutda Didar Didarow geçirdi.

Tapgyryň iň gyzykly duşuşyklarynyň biri türkmen paýtagtyndaky «Aşgabat» stadionynda geçirildi. Bu ýerde «Ahal» topary «Nebitçini» 4:2 hasabynda ýeňdi. Hasaby duşuşygyň 3-nji minudynda Süleýman Mirzoýew açdy. 29-njy minutda bolsa ol 11 metrlik jerime urgusyndan özüniň ikinji goluny geçirdi. Şeýle-de «Ahaldan» Magtymberdi Berenow bilen Döwran Hojamämmedow hem tapawutlandy. «Nebitçiniň» düzüminde Myratdurdy Baýramow we Hydyr Agöýliýew gol geçirdi.

Tapgyryň iň uly hasaply ýeňşi türkmen paýtagtyndaky «Aşgabat» stadionynda boldy. «Arkadag» topary «Merwi» 7:0 hasabynda ýeňlişe sezewar etdi. Duşuşykda Welmyrat Ballakow, Baýram Ataýew, Didar Durdyýew, Ýazgylyç Gurbanow, Ahmet Ataýew we Begenç Akmämmedow tapawutlandy. Ýazgylyç Gurbanow bu oýunda iki gezek gol geçirmegi başardy.

Şeýlelikde, çärýek finalyň ilkinji duşuşyklaryndan soň «Arkadag», «Altyn Asyr» we «Ahal» toparlary ýarym finala çykmak ugrunda uly artykmaçlyk gazandy. «Köpetdag» bolsa jogap duşuşygynyň öňüsyrasynda minimal üstünlige eýe boldy.

Futbol boýunça Türkmenistanyň Kubogyny almak ugrunda ýaryşyň jogap duşuşyklary 24-nji iýunda geçiriler.