"Ahal" futbol topary, 25-nji oktýabrda geçiren duşuşygynda Ýokary liganyň şu möwsümindäki 18-nji ýeňşini gazandy. Topar 27-nji tapgyryň senesi süýşürilen duşuşygynda "Köpetdagy" 3:1 hasabynda ýeňdi.
Birinji ýarymynda hasap açylmadyk duşuşygyň 55-nji minudynda geçiren goluna "Köpetdagyň" futbolçylary bary-ýogy 1 minut begenip bildiler. Eýýäm 56-njy minutda hasaby deňlän "Ahal" şondan soň hem garşydaşyň derwezesinden iki gol geçirdi.
Dört duşuşykda üçünji ýeňiş
Ýokary liganyň şu möwsümindäki «Ahal» ― «Köpetdag» duşuşyklary gollara baý boldy. Bu duşuşyklarda birinji aýlawda «Köpetdag» 3:2 hasabynda ýeňiş gazanan bolsa, ikinji we üçünji aýlawlarda «Ahal», degişlilikde, 4:0 we 4:1 hasaplarynda ýeňşi öz adyna ýazdyrdy. Görşüňiz ýaly bu günem janköýerler gollara baý duşuşyga tomaşa etdiler.
"Ahal" ikinji orunda
Bu ýeňişden soň utugyny 55-e çykaran "Ahal" kümüş medal ugrundaky göreşde "Altyn Asyrdan" bir ädim öňe saýlandy. 25-nji duşuşygynda 17-nji gezek ýeňlen "Köpetdag" bolsa 14 utuk bilen iň soňky orunda galdy.
Indiki duşuşyklar
Iki topar hem Ýokary ligada indiki duşuşygyny 30-njy oktýabrda geçirer. Şol gün 28-nji tapgyryň çäginde "Ahal" "Merwiň" myhmany bolar, "Köpetdag" bolsa paýtagt derbisinde "Aşgabady" kabul eder. Möwsümiň galan böleginde "Ahal" kümüş medal ugrunda göreşer. "Köpetdag" bolsa möwsüm tamamlanýança, iň soňky basgançakdan iň bolmanda, bir basgançak ýokary galmaga synanyşar.
TÝL ― 2024. 27-nji tapgyryň geçirilen duşuşygynyň netijesi:
25.10.2024ý. (Anna)
«Ahal» – «Köpetdag» — 3:1
[0:1] — 55’ Süleýman Mirzoýew
[1:1] — 56’ Daýanç Meredow
[2:1] — 68’ Ýazgylyç Gurbanow
[3:1] — 86’ Elman Tagaýew
Duýduryşlar:
48’ Orazmuhammet Işangulyýew («Köpetdag»)
59’ Bagtyýar Gürgenow («Ahal»)
85’ Magtymberdi Berenow («Ahal»)
Meýdandan çykarylan:
59’ Goçmyrat Kakageldiýew («Köpetdag»)
Geçirilen ýeri: Sport mekdep-internatynyň sport desgasy (Gökdepe etr. Babarap obasy)
Duşuşygyň emini: J.Jumamyradow (Aşgabat ş.)
Kömekçi eminler: R.Ereşow (Türkmenabat ş.), M.Allaberdiýew (Aşgabat ş.)
Ätiýaçdaky emin: E.Ýazmyradow (Aşgabat ş.)
Gözegçi emin: B.Allaberdiýew (Aşgabat ş.)
