Türkmenistanyň ýaşlar ýygyndy topary futbol boýunça 2026-njy ýylyň 7-25-nji ýanwary aralygynda Saud Arabystanynda geçiriljek Aziýa Kubogynyň (U23) saýlama tapgyrynda çykyş eder.

Geçirilen bijä laýyklykda, Türkmenistanyň ýaşlar ýygyndysy «A» toparçada Iordaniýanyň, Hytaý Taýpeýiniň hem-de Butanyň ýygyndylary bilen yklym birinjiliginiň ýollanmasy ugrunda bäsleşmäge mümkinçilik aldy. Ýygyndy toparymyz saýlama tapgyryndaky ilkinji duşuşygyny 3-nji sentýabrda Hytaý Taýpeýiň ýygyndysynyň garşysyna geçirer. 6-njy sentýabrda ikinji tapgyryň çäginde geçiriljek duşuşykda Butan bilen güýç synanyşjak ýygyndy toparymyzyň soňky garşydaşy Iordaniýanyň ýaşlar ýygyndysy bolar. Toparçanyň jemleýji duşuşygy 9-njy sentýabrda geçiriler. Ýeri gelende bellesek, “A” toparçasynyň duşuşyklary şu ýylyň 3–9-njy sentýabry aralygynda merkezleşdirilen görnüşinde Iordaniýada geçiriler.

Aziýa Kubogy-2026-nyň saýlama tapgyryna 44 döwlete wekilçilik edýän ýaşlar ýygyndylary toparçalaryň 11-sinde bäsleşerler. Geçiriljek duşuşyklaryň netijesinde toparçalarda birinji orunlary eýelänler bilen birlikde iň gowy netije görkezen ikinji orunlary eýelän ýygyndylaryň 4-si hem-de ýer eýesi bolan Saud Arabystanynyň ýygyndy toparlary Yklym ýaryşynyň final tapgyrynda çykyş ederler.

Saýlama tapgyrynda “A” toparçada geçiriljek duşuşyklaryň senenamasy:

1-nji tapgyr (03.09.2025 ý.):

Türkmenistan -Hytaý Taýpeýi

Iordaniýa – Butan

2-nji tapgyr (06.09.2025ý.):

Butan -Türkmenistan

Hytaý Taýpeýi –Iordaniýa

3-nji tapgyr (09.09.2025 ý.):

Hytaý Taýpeýi - Butan

Iordaniýa – Türkmenistan

Çeşmesi: Türkmenistanyň Futbol federasiýasy