Türkmenistanyň Wengriýadaky ilçisi Hemra Amannazarow Budapeştde birnäçe resmi gepleşikleri geçirdi. Bu duşuşyklaryň maksady döwletleriň arasyndaky ikitaraplaýyn gatnaşyklary pugtalandyrmakdan ybaratdyr.
Wengriýanyň Daşary işler ministrliginiň Medeniýet boýunça Döwlet sekretarynyň orunbasary Mate Winse bilen geçirilen duşuşykda görnükli türkmen şahyry we akyldary Magtymguly Pyragynyň doglan gününiň 300 ýyllygy mynasybetli geçiriljek dabaralaryň maksatnamasy ara alnyp maslahatlaşyldy. Şunda Wengriýada Türkmenistanyň Medeniýet günlerini geçirmegiň mümkinçiliklerini-de seredildi.
Bellenilişi ýaly, jenap Winse türkmen tarapyny Wengriýada geçiriljek medeni çärelere gatnaşmaga çagyrdy.
Ilçi H.Amannazarow Magtymguly Pyragynyň doglan gününiň 300 ýyllygy mynasybetli köp sanly medeni çäreleriň meýilleşdirilýändigi barada belläp, wengriýaly medeniýet we sungat işgärlerini, alymlar dabaralara gatnaşmaga çagyrdy.
Medeni hyzmatdaşlyk meselelerinden başga-da, türkmen ilçisiniň geçiren ýygnaklarynda söwda-ykdysady hyzmatdaşlygy pugtalandyrmak bilen bagly meseleler ara alnyp maslahatlaşyldy. Hususan-da, H.Amannazarow Wengriýanyň Daşary işler ministrliginiň Döwlet sekretarynyň Gündogar gatnaşyklaryny ösdürmek boýunça orunbasary Adam Ştifter bilen söwda, ykdysady we medeni gatnaşyklary giňeltmegiň ýollaryny ara alyp maslahatlaşdy. Taraplar şu ýyl ýetip gelýän wakalar we syýasy gepleşiklere taýýarlyk barada maglumatlary alyşdylar.
Mundan başga-da, ilçi Arkadag şäheri bilen Wengriýanyň şäherleriniň arasynda hyzmatdaşlygy ýola goýmagyň mümkinçilikleri barada pikirini beýan etdi.
