Hormatly Prezidentimiz Serdar Berdimuhamedowyň nebit-gaz we geologiýa pudaklarynyň işgärlerine iberen Gutlagynda Türkmenistanda tebigy gazyň gaýtadan işlenmegine we dünýä bazarynda isleg bildirilýän önümleriň öndürilmegine uly üns berilýändigi bellenýär. Muny soňky ýyllarda birnäçe döwrebap gaz-himiýa toplumlarynyň gurlup, ulanylyşa berilmegi-de tassyklaýar.

15-nji dekabrda Türkmenistanyň Ylymlar akademiýasynyň Himiýa institutynda geçirilen «Nebit we gaz senagaty – milli ykdysadyýetiň esasy pudagy» atly ylmy maslahatda ýurdumyzyň baý uglewodorod gorlaryny innowasiýa we ekologiýa taýdan arassa tehnologiýalara esaslanyp, gaýtadan işleýän täze önümçilik desgalaryny ösdürmek meseleleri ara alnyp maslahatlaşyldy.

Bu çärä Himiýa institutynyň alymlary we aspirantlary bilen bir hatarda Ýagşygeldi Kakaýew adyndaky Halkara nebit we gaz uniwersitetiniň wekilleri-de gatnaşdy. Duşuşygy giriş sözi bilen Himiýa institutynyň müdiri Hallymyrat Ataýew açdy.

Duşuşyga gatnaşanlaryň çykyşlarynda Himiýa institutynda ýurdumyzyň mineral, gidromineral, uglewodorod we beýleki tebigy baýlyklaryny gaýtadan işlemegiň ylmy esaslaryny ösdürmek boýunça geçirilen barlaglaryň netijeleri beýan edildi. Işleýän önümçilikleri ýerli çig mal bilen üpjün etmek, uglewodorod çig malyny gaýtadan işleýän tehnologiýalary kämilleşdirmek, serişdeleri tygşytlamak, önümçiligiň netijeliligini we ulanylýan hem täzeden açylýan nebitdir gaz ýataklaryndan alynýan nebitden, gazdan, şeýle hem gaz kondensatyndan öndürilýän önümleriň hilini ýokarlandyrmak maksady bilen, gazanylan üstünlikler we geljekdäki meseleler ara alnyp maslahatlaşyldy.

Çeşme: «Türkmenistan: Altyn asyr»