2025-nji ýylyň 18-nji iýulynda Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň mejlisini geçirdi.
Ministrler Kabinetiniň Başlygynyň orunbasary H.Geldimyradow abraýly halkara guramalar bilen hyzmatdaşlygy pugtalandyrmak boýunça durmuşa geçirilýän işler barada hasabat berdi. Şunuň bilen baglylykda, wise-premýer döwlet Baştutanymyzyň garamagyna Ykdysady hyzmatdaşlyk we ösüş guramasynyň käbir resminamalaryna, hususan-da, Salgyt meseleleri boýunça özara administratiw kömegi bermek hakynda Konwensiýa hem-de Ygtyýarly taraplaryň maliýe hasaplar boýunça maglumatlaryny awtomatik alyşmagy hakynda köptaraplaýyn Ylalaşyga ýurdumyzyň goşulmagy baradaky teklibi hödürledi. Döwlet Baştutanymyz bu teklibi makullap, Ykdysady hyzmatdaşlyk we ösüş guramasynyň resminamalaryna goşulmak boýunça degişli işleri geçirmegi wise-premýere tabşyrdy.
Mejlisiň dowamynda Türkmenbaşydaky nebiti gaýtadan işleýän zawodlar toplumynyň Kenar toplaýjy-ýükleýji nebit kärhanasynyň nebit we nebit önümleri guýulýan üçünji gämi duralgasy dabaraly ýagdaýda açyldy. Täze desganyň ýyllyk ýükleýiş kuwwaty 2 million 60 müň tonna, düşürmek kuwwaty bolsa 1 million 150 müň tonnadan ybaratdyr. Prezident döwrebap desganyň işe girizilmegine sanly wideoaragatnaşyk arkaly ak pata berdi.
Mejlisiň Başlygy D.Gulmanowa milli kanunçylyk binýadyny mundan beýläk-de kämilleşdirmegiň çäklerinde ýerine ýetirilýän işler barada maglumat berdi. Mejlis agzalary Birleşen Milletler Guramasynyň Çagalar gaznasynyň wekilleri bilen bilelikde çagalaryň hukuklaryny düşündirmek boýunça okuw maslahatlaryny geçirdiler.
Ministrler Kabinetiniň Başlygynyň orunbasary, daşary işler ministri R.Meredow halkara guramalar bilen howpsuzlyk meseleleri boýunça hyzmatdaşlygy pugtalandyrmak babatda alnyp barylýan işler barada hasabat berdi. Hususan-da, 2017-nji ýylda kabul edilen Ýadro ýaragyny gadagan etmek baradaky Şertnama goşulmak mümkinçiligini öwrenmek we 2026-njy ýylda Ýadro synaglaryny doly gadagan etmek baradaky şertnamanyň guramasy (ÝSDGŞ) bilen sebitleýin seminaryň geçirilmegini gurnamak teklip edildi.
Wise-premýer B.Orazdurdyýewa "Saglyk" Döwlet maksatnamasynyň kabul edilmeginiň 30 ýyllygy mynasybetli meýilleşdirilen çäreler barada hasabat berdi. Aşgabatda, Arkadag şäherinde hem-de welaýat merkezlerinde maslahatlar, saglygy goraýyş ulgamynda tapawutlanan işgärlere sowgat gowşurylyş dabaralary we sergiler geçiriler.
Mejlisiň netijeleri boýunça oba hojalygyny ösdürmek, türkmen-iýapon işewürlik forumyna taýýarlyk görmek hem-de ýurduň halkara howa menzillerini döwrebaplaşdyrmak meseleleri ara alnyp maslahatlaşyldy.
