Ýaponiýada saparda bolýan hormatly Prezidentimiz Serdar Berdimuhamedow şu gün ir bilen Osaka şäherinde geçirilýän «EKSPO — 2025» Bütindünýä sergisiniň çäginde guralan Türkmenistanyň Milli gününe gatnaşdy. Mälim bolşy ýaly, Türkmenistan bu iri gözden geçirilişe gatnaşýan 160-a golaý ýurduň arasynda öz Milli gününi ilkinjileriň hatarynda geçirmek hormatyna eýe boldy.
Bütindünýä «EKSPO» sergileriniň 174 ýyllyk taryhynyň dowamynda Ýaponiýa indi üçünji gezek şeýle abraýly gözden geçirilişiň geçirilýän ýerine öwrüldi. «EKSPO — 2025-i» geçirmek üçin saýlanyp alnan Osaka şäherinde bolsa ol ikinji gezek guralýar. Ozal bu ýerde 1970-nji ýylda Aziýa yklymynda ilkinji «EKSPO» geçirilip, ol XX asyrda iň köp adamyň baryp gören gözden geçirilişi hökmünde taryha girdi. Bu gezekki Bütindünýä «EKSPO» sergisini geçirmek üçin Osakadan uzak bolmadyk ýerde ýörite emeli ada hem döredilip, onuň Ýumeşima ady «Arzuwlar adasy» diýmegi aňladýar. Aslynda, Osaka-Kansaý sebiti ilkinji ýapon döwletiniň dörän mekany bolup, ol taryhy syýahatçylyk, milli aýratynlyklardyr ýadygärlikler bilen tanyşmak üçinem giň mümkinçilikleri açýar. 13-nji aprelden 13-nji oktýabr aralygynda dowam etjek «EKSPO — 2025-iň» geçýän ýeriniň daş-töweregi «Uly halka» bilen gurşalyp alnandyr. «Uly halka» uzynlygy 2 kilometre, beýikligi 20 metre ýetýän agaç gurluş bolup, ol eýýäm agaçdan gurlan iň uly ýapyk desga hökmünde Ginnesiň rekordlar kitabyna girizildi. Osaka sergisi «Durmuşy halas etmek», «Durmuş mümkinçiliklerini giňeltmek», «Durmuşy birleşdirmek» atly üç mowzukda guralyp, Türkmenistanyň milli pawilýony «Durmuş mümkinçiliklerini giňeltmek» bölüminde ýerleşýär.
...Irden «EKSPO — 2025» Bütindünýä sergisiniň ýokary derejeli myhmanlary kabul ediş binasyna gelen hormatly Prezidentimiz bu ýerde serginiň Hormatly myhmanlar kitabynda ýadygärlik ýazga galdyrdy. Soňra döwlet Baştutanymyz Serdar Berdimuhamedow Ýaponiýanyň EKSPO — 2025» Bütindünýä sergisi boýunça ministri Ito Ýoşitaka bilen bilelikde Türkmenistanyň Milli güni mynasybetli dabara gatnaşyp, bu ýerde söz sözledi. Şu günler Ýaponiýada bolýan türkmen medeniýet we sungat ussatlarynyň çykyşlary bolsa dabara baýramçylyk öwüşginini çaýdy. Soňra hormatly Prezidentimiz Ýaponiýanyň resmi wekilleri bilen bilelikde Türkmenistanyň milli pawilýonyna baryp gördi. Döwlet Baştutanymyz dabara gatnaşyjylaryň şowhunly el çarpyşmalary astynda pawilýonyň toý bagyny kesdi. Soňra bu özboluşly desga bilen tanyşlyk boldy. Belent mertebeli myhmanlar ýurdumyzyň taryhyny, gözel tebigatyny, milli baýlyklaryny, Berkarar döwletiň täze eýýamynyň Galkynyşy döwründe Watanymyzyň ýeten belent sepgitlerini beýan edýän, 3D animasiýa görnüşinde taýýarlanan wideoşekile tomaşa etdiler. Binanyň ikinji gatynda Arkadag şäheriniň, Türkmenistanyň ministrlikleriniň we pudak edaralarynyň sergi eksponatlary ýerleşýär. Üçünji gatda bolsa myhmanlara türkmen milli tagamlary hödürlenilýär. Soňra Arkadagly Gahryman Serdarymyz we Ýaponiýanyň resmi wekilleri «Günüň dogýan ýurdunyň» milli pawilýony bilen hem tanyşdylar.
Ýeri gelende bellesek, hormatly Prezidentimiziň Kararyna laýyklykda, «EKSPO — 2025» Bütindünýä sergisinde Türkmenistanyň milli pawilýonyny gurmak «Belli» hojalyk jemgyýetine ynanyldy. Taslamanyň arhitekturasy özboluşly mana eýe bolup, binanyň üçburç görnüşli gurluşy öňe hereket etmegi, ýaşaýşyň dowamatlylygyny, täzelenişi alamatlandyrýar. Pawilýonyň gümmez şekilli bölegi türkmen halkynyň däp-dessurlaryndan we milli gymmatlyklaryndan, haly nagyşlaryndan ylham alnyp döredilipdir. Onuň daşky keşbi bolsa Garagum sährasynyň tebigy görnüşleri bilen sazlaşýar. Millilik bilen döwrebaplygyň özboluşly sazlaşygyny emele getirip, geçmişiň, şu günüň hem geljegiň aýrylmaz baglanyşygyny açyp görkezmek filosofiýasyny özünde jemleýän türkmen pawilýony entek resmi taýdan öz işine başlamanka syýahatçylarda aýratyn gyzyklanma döretdi. Türkmenistanyň Osakada geçirilýän giň gerimli gözden geçirilişe gatnaşmagynyň esasy maksady özygtyýarly ösüş ýyllarynda dürli ugurlarda gazanylan üstünlikleri dünýä ýaýmakdan, daşary ýurtlar bilen söwda-ykdysady gatnaşyklary giňeltmekden, öndürilýän harytlaryň eksportyny artdyrmakdan ybaratdyr.
Çeşme: «Türkmenistan» gazeti
