23 — 25-nji oktýabr aralygynda Aşgabatda «Türkmenistanyň nebiti we gazy — 2024» atly XXIX halkara maslahat we sergisi (OGT-2024) geçiriler. Çärä «Türkmennebit», «Türkmengaz» döwlet konsernleri we «Türkmengeologiýa» döwlet korporasiýasy, şeýle-de Türkmenistanyň Söwda-senagat edarasy guramaçylyk edýär.

Aşgabatda her ýyl «Türkmenistanyň nebiti we gazy» maslahatynyň we sergisiniň geçirilmegi Türkmenistany dünýäniň nebit we gaz pudagynyň merkezine öwürýär. Bu möhüm halkara foruma dünýäniň dürli künjeklerinden öňdebaryjy hünärmenleri, abraýly kompaniýalaryň wekillerini we döwlet işgärlerini bir ýere jemleýär. Bu bolsa dünýädäki häzirki tendensiýalary ara alyp maslahatlaşmaga we möhüm şertnamalary baglaşmaga şert döredýär.

OGT-2024 maslahaty we sergisi ilkinji gezek 20 ýyldan gowrak mundan ozal gurnaldy we şondan soň dünýä nebit-gaz, şeýle hem energiýa pudagynyň esasy wakalarynyň birine öwrüldi.

Maslahatyň dowamynda energiýanyň geljegi, Türkmenistanyň nebit toplumynda we gaz pudagynda maýa goýum mümkinçiliklerini, «ýaşyl» energetika, uglewodorod ýataklaryny işläp taýýarlamagyň ekologiýa jähtleri, tehnologiki innowasiýalary we halkara energiýa bazaryndaky maýa goýumlarynyň ähmiýeti ýaly meseleler ara alnyp maslahatlaşylar. Halkara maslahata we sergä Türkmenistanyň döwlet edaralarynyň, öňdebaryjy halkara nebitgaz kompaniýalarynyň, şeýle hem iň iri halkara maliýe institutlarynyň ýolbaşçylary we wekilleri gatnaşýarlar.

Maslahat bilen ugurdaşlykda dowam etjek  sergi bolsa içerki we daşarky nebit-gaz pudaklaryndan iň gowy harytlary hödürlär. Munuň özi häzirki energiýa bazarynyň talaplaryna laýyk gelýän täze pikirleri we aýratynlyklary döretmäge itergi berer. Maslahat we sergi kämil energetika tehnologiýalarynyň ösmegine mümkinçilik berip, gatnaşyjylaryň arasynda tejribe alyşmaga mümkinçilik döreder.