Türkmenistanyň Ylymlar akademiýasynyň Seýsmologiýa we atmosferanyň fizikasy instituty daşary ýurtly hyzmatdaşlar bilen ylmy gatnaşyklary işjeň ösdürýär. Seýsmologiýa ylmyny ösdürmek boýunça döwlet maksatnamasynyň durmuşa geçirilmeginiň çäginde türkmen alymlary dürli ýurtlaryň kärdeşleri bilen hyzmatdaşlygy güýçlendirýärler. Şu ýylyň ýazynda Türkmenistanyň Ylymlar akademiýasynyň Seýsmologiýa we atmosferanyň fizikasy instituty bilen Täjigistanyň Milli ylymlar akademiýasynyň Geologiýa, seýsmiki durnukly gurluşyk we seýsmologiýa institutynyň arasynda özara düşünişmek hakynda Ähtnama gol çekildi. Resminama seýsmiki hadysalary bilelikde öwrenmegi we seýsmiki töwekgelçiliklere baha bermegi göz öňünde tutýar.

Mundan başga-da, Türkmenistanyň Ylymlar akademiýasynyň Seýsmologiýa we atmosferanyň fizikasy instituty bilen Hytaýyň ýer titremesini dolandyrmak administrasiýasynyň seýsmologiýa instituty ylmy we tehniki hyzmatdaşlyk baradaky şertnama gol çekmäge taýýarlanýar. Şeýle hem, Özbegistan Respublikasynyň G.A.Mawlýanow adyndaky Ylymlar akademiýasy bilen özara düşünişmek hakynda Ähtnama gol çekmek üçin taýýarlyk görülýär.

Türkmen hünärmenleri Aşgabatda seýsmologiki gözegçilik ulgamyny döwrebaplaşdyrmak boýunça Ýaponiýa bilen bilelikde guralan taslama hem gatnaşýarlar. Taslama sanly gözegçilik ulgamynyň işini has-da ýokarlandyrmagy meýilleşdirýär.

Halkara hyzmatdaşlygy giňeltmek, seýsmologiýa pudagyndaky gözlegleriň netijeliligini ýokarlandyrmaga we Türkmenistanyň seýsmiki howpsuzlygyny üpjün etmäge gönükdirilendir.

 Çeşme: Türkmenmetbugat