Hormatly Prezidentimiziň şu ýylyň 23-nji maýynda gol çeken degişli Karary we Buýrugy bilen, Türkmenistanyň Ministrler Kabinetiniň Başlygynyň orunbasary Batyr Amanowyň ýolbaşçylygyndaky wekiliýet Saud Arabystanynyň paýtagty Er-Riýad şäherinde gulluk iş saparynda boldy. Wekiliýetiň düzümine ýurdumyzyň nebitgaz toplumynyň ýolbaşçylary hem goşuldy.

Gulluk iş saparynyň dowamynda ýurdumyzyň wekiliýetiniň agzalary Söwda-ykdysady hyzmatdaşlyk boýunça bilelikdäki hökümetara türkmen-saud toparynyň ýedinji mejlisine hem-de «Merkezi Aziýa – Aýlagdaky arap döwletleriniň hyzmatdaşlyk geňeşine agza ýurtlaryň maýa goýum forumyna» gatnaşdylar.

Bu saparyň çäginde 29-njy maý gününiň birinji ýarymynda türkmen wekiliýeti şäheriň «Fairmont Riýadh» myhmanhanasynyň mejlisler zalynda geçirilen «Merkezi       Aziýa ― Aýlagdaky arap döwletleriniň hyzmatdaşlyk geňeşine agza ýurtlaryň maýa goýum forumyna» gatnaşdy. Agzalan forumyň Gün tertibine laýyklykda, çykyş edildi we sowal-jogap alşyldy. Şol günüiň ikinji ýarymynda bolsa ýene şu myhmanhanada Söwda-ykdysady hyzmatdaşlyk boýunça bilelikdäki hökümetara türkmen-saud toparynyň ýedinji mejlisi guramaçylykly geçirildi.

Mejlisiň dowamynda iki ýurduň arasynda özara gyzyklanma bildirilýän ulgamlarda, ýagny, maýa goýum, söwda-ykdysady pudagynda, ulag, standartlar we metrologiýa ugurlarynda, nebitgaz we energetika pudagynda, senagat, dag-magdany we himiýa pudagynda, saglyk, daşky gurşaw, suw we oba hojalygy pudagynda, bilim, ylym we aragatnaşyk pudaklarynda, şeýle hem sport, habar beriş we medeniýet, durmuş goraglylyk ýaly ulgamlarynda, ýardam bermek we ynsanperwerlik ugurlarynda hyzmatdaşlyk etmek boýunça möhüm meseleler ara alnyp maslahatlaşdy. Iki ýurduň arasynda agzalan ugurlar boýunça hyzmatdaşlyk etmek üçin giň mümkinçilikleriň bardygy bellenildi.

Şeýle hem Söwda-ykdysady hyzmatdaşlyk boýunça bilelikdäki hökümetara türkmen-saud toparynyň ýedinji mejlisiniň netijesi boýunça bilelikdäki Teswirnama gol çekildi.