“Türkmenaragatnaşyk” agentliginiň başlygy Hajymyrat Hudaýgulyýew maglumat merkezini döretmek, ikinji milli emeli hemrany işe girizmek, optiki süýüm kabelini we serwer enjamlaryny öndürmek boýunça bilelikdäki kärhanalary gurmak babatdaky taslamalar bilen tanyşdyryp, daşary ýurtly maýadarlary özara bähbitli hyzmatdaşlygyň bu geljegi uly ugurlaryna garamaga çagyrdy.
Parižde TEIF 2024 halkara maýa goýum forumynda “Türkmenaragatnaşyk” agentliginiň ýolbaşçysy öz çykyşynda IT-hyzmatlary we “akylly” şäherleri dolandyrmak ulgamlaryny ösdürmek, öýjükli aragatnaşyk ulgamlaryny döwrebaplaşdyrmak we stasionar telefon ulgamyna täze tehnologiýalary ornaşdyrmak, pudagyň işgärleriniň hünär derejesini ýokarlandyrmak boýunça Türkmenistan bilen hyzmatdaşlygy ýola goýmagyň mümkinçiliklerine 30-dan gowrak ýurduň işewür toparlarynyň wekilleriniň ünsüni çekdi.
Ýewropa ugry boýunça Hazar deňziniň üsti bilen optiki süýümli aragatnaşyk ulgamynyň gurluşygy Türkmenistanyň daşary ýurt maýadarlarynyň we kompaniýalarynyň gatnaşmagynda durmuşa geçirilmegine gyzyklanma bildirýän iri taslamalaryň biridir.
Häzirki günde sanly ulgamy ösdürmek Türkmenistanyň döwlet syýasatynyň ileri tutulýan ugurlarynyň birine öwrüldi. Ýurdumyzda Sanly ykdysadyýeti ösdürmegiň 2019-2025-nji ýyllar üçin Maksatnamasy durmuşa geçirilýär, Elektron Hökümeti döredilýär, elektron söwda pudagy ösdürilýär. Saglygy goraýyş, bilim, oba hojalygy, energetika, şol sanda ýaşyl energetika pudaklaryna sanly ulgam işjeň ornaşdyrylýar.
Türkmenistanyň mundan beýläk-de innowasion taýdan ilerlemegi bulut hyzmatlary bazarynyň ösdürilmegini, ykdysadyýeti maglumat tehnologiýalary esasynda guramagyň täze usullarynyň işlenip taýýarlanylmagy, ilkinji Arkadag akylly şäheriniň mysalynda “akylly” şäher konsepsiýasynyň durmuşa geçirilmegini göz öňüne tutýar.
Durmuşa geçirilýän taslamalaryň çäklerinde milli aragatnaşyk ulgamynyň üstaşyr mümkinçilikleriniň giňeldilmegine, şeýle hem aragatnaşyk akymynyň geçirijilik ukybynyň ýokarlandyrylmagyna aýratyn üns berilýär.
Häzirki wagtda Türkmenistan döwletara optiki-süýümli magistral aragatnaşyk ulgamynyň sekizisine birikdirildi we soňky üç ýylyň dowamynda halkara Internet-trafiginiň umumy möçberi 10 esse ýokarlandy.
Hajymyrat Hudaýgulyýew bu mesleleri has içgin ara alyp maslahatlaşmak üçin gyzyklanma bildirýän taraplary 14-16-njy noýabrda Aşgabatda geçiriljek “Türkmentel-2024” halkara sergisine we ylmy maslahatyna gatnaşmaga çagyrdy.
çeşme:https://railway.gov.tm/
