Aşgabatda Türkmenistanyň Daşary işler ministriniň orunbasary Ahmet Gurbanowyň Koreýa Respublikasynyň Türkmenistandaky Adatdan daşary we Doly ygtyýarly ilçisi Li Won-Je bilen duşuşygy geçirildi.

Türkmenistanyň Daşary işler ministrliginde geçirilen gepleşikleriň dowamynda taraplar ikitaraplaýyn hyzmatdaşlygyň giň gerimli meselelerini ara alyp maslahatlaşdylar. Şunda ykdysady hyzmatdaşlygyň esasy ugurlarynyň biri hökmünde gazhimiýa senagatynda gatnaşyklary ösdürmeklige aýratyn üns berildi.

Koreýa Respublikasynyň kompaniýalarynyň Türkmenistanda iri maýa goýum taslamalarynyň, şol sanda tebigy gazy gaýtadan işlemek we gazhimiýa toplumynyň önümlerini çykarmak boýunça taslamalaryň durmuşa geçirilmegine uly goşant goşýandygy bellenildi.

Koreýa Respublikasynyň kompaniýalarynyň gatnaşmagynda Türkmenistanda amala aşyrylan iri taslamalaryň hatarynda Balkan welaýatynyň Gyýanly şäherçesindäki gazhimiýa toplumyny, «Galkynyş» ýatagyndaky harytlyk gazy arassalaýjy zawody, Türkmenbaşydaky nebiti gaýtadan işleýän zawodlar toplumynda täze tehnologik ulgamlary gurnamak boýunça birnäçe taslamalary we beýlekileri görkezmek bolar.

Söhbetdeşler iki ýurduň arasyndaky söwda-ykdysady hyzmatdaşlygyň strategik we uzak möhletleýin häsiýete eýedigini nygtydylar. 
Diplomatlar şeýle hem syýasy-diplomatik ugurdaky hyzmatdaşlygyň ösüşini, şol sanda daşary syýasat edaralarynyň arasyndaky yzygiderli geňeşmeleri, parlamentara gatnaşyklary hem-de halkara guramalarynyň, ilkinji nobatda BMG-niň çäklerindäki hyzmatdaşlygy ara alyp maslahatlaşdylar.