Ýagşygeldi Kakaýew adyndaky Halkara nebit we gaz uniwersitetiniň talyby Maral Gullyýewa adaty kükürtden boýag öndürmek tehnologiýasynyň awtory boldy. Onuň oýlap tapyşy Türkmenistanyň Maliýe we ykdysadyýet ministrliginiň Intellektual eýeçilik boýunça döwlet gullugy tarapyndan bellige alyndy.

Ylmy iş uniwersitetiň himiýa tehnologiýasy we ekologiýa fakultetiniň laboratoriýasynda alnyp baryldy. Laboratoriýa barlaglary we synaglary «Galkynyş» gaz käninden alynýan adaty kömür bilen geçirildi.

Ilkinji tapgyr adaty kükürtden kükürt turşusyny almakdan ybarat boldy. Soňra kükürt turşusynyň alýuminiý bilen himiki täsirleşmesiniň netijesinde alýuminiý sulfaty emele geldi. Alýuminiý sulfatyna gips, hek we birnäçe beýleki düzüm bölekleriniň goşulmagy bilen boýag we ýelim maddalary alyndy.

Maddalary synagdan geçirmek olaryň çydamly we antiseptik häsiýetlere eýedigini görkezdi. Şeýle hem olaryň dürli jandarlar, daşky gurşaw we toprak üçin zyýansyzdygy anyklandy.

Innowasion boýag we ýelim maddalarynyň önümçiligi geljekde ykdysady taýdan bähbitli we çylşyrymly tehnologiýalary talap etmeýän ugur hökmünde göz öňünde tutulýar. Alnan önümler halk hojalygynyň dürli pudaklarynda, hususan-da, gurluşyk, kagyz, deri, dokma we beýleki ykdysady taýdan ähmiýetli ugurlarda ulanylyp bilner.

Kükürti gaýtadan işlemegiň täze mümkinçilikleri Türkmenistanda nebitgaz we himiýa senagatynyň ösmegine uly täsir eder.