Halkara zenanlar gününiň öňüsyrasynda “Türkmennebit” döwlet konserniniň Balkanabat nebitçilik orta hünär okuw mekdebiniň iň owadan, zehinli talyp gyzy saýlanyldy. Bu ýerde "Talyp gözeli-2026" bäsleşiginiň deslapky tapgyry dabaraly ýagdaýda geçirilip, ýaşlygyň, gözelligiň we döredijiligiň baýramyna öwrüldi.

Bäsleşik ýaşlaryň intellektual, döredijilik mümkinçiliklerini açyp görkezmäge, işjeň gyzlara goldaw bermäge, şeýle-de milli däp-dessurlarymyzy we medeni gymmatlyklarymyzy wagyz etmäge gönükdirildi. Oňa gatnaşyjylar diňe bir daşky gözelligi däl, eýsem taýýarlygyň ýokary derejesini, artistlik ukyplaryny, ugurtapyjylygyny hem-de sahnada özüni ynamly alyp barmak başarnyklaryny görkezdiler.

Bäsleşik birnäçe tapgyrdan ybarat boldy — özüň bilen tanyşdyrmak, ýagny gyzyklanmalaryň, öňde goýan maksatlaryň we gazanan üstünlikleriň barada gürrüň bermekden başlap, milli lybaslaryň görkezilişine çenli.

Bäsleşigiň ýeňijileri okuw mekdebiniň we kärdeşler arkalaşygynyň adyndan Hormat haty hem-de gymmat bahaly sowgatlar bilen sylaglandy.