Azerbaýjan Respublikasyna iş saparynyň çäklerinde Türkmenbaşy Halkara deňiz portunyň direktory Parahat Jumaýewiň ýolbaşçylygyndaky Türkmenistanyň wekiliýeti “Baku Halkara deňiz porty” jogapkärçiligi çäklendirilen jemgyýetiniň ýolbaşçysy Eldar Salahow bilen duşuşdy. Duşuşyga Türkmenistanyň Azerbaýjan Respublikasyndaky Adatdan daşary we Doly ygtyýarly ilçisi Gurbanmämmet Elýasow hem gatnaşdy.

Duşuşygyň dowamynda bellenilişi ýaly, Türkmenistan we Azerbaýjan strategik hyzmatdaşlygyny yzygiderli pugtalandyrýar, aýratyn hem, Türkmenbaşy we Baku (Alat) Halkara deňiz portlarynyň arasynda logistika hyzmatdaşlygyny ösdürmäge üns berilýär. Bu babatda özara söwda dolanyşygynyň artýan şertlerinde Hazar deňziniň üsti bilen ýük daşamalaryny artdyrmaklyga, Orta geçelgäni ösdürmeklige we iki ýurduň arasyndaky ulag gatnaşyklaryny giňelteklige aýratyn ähmiýet berilýär.

Türkmenbaşy we Baku (Alat) portlarynyň ösdürilmegi olary halkara Gündogar-Günbatar geçelgelerine hyzmat edýän Hazar deňziniň esasy logistika merkezlerine öwürmäge gönükdirilendir. Iki porty birleşdirýän esasy ýol nebitiň, dürli ýükleriň we demir ýol wagonlarynyň daşalmagyny üpjün edýär.

Döwrebaplaşdyrylandan soň, Türkmenbaşy Halkara deňiz porty iri ulag merkezine öwrüldi, Alatdaky Baku porty bolsa öz infrastrukturasyny yzygiderli giňeldýär, ýük we ýolagçy gatnawlarynda öz ornuny güýçlendirýär we Beýik Ýüpek ýolunyň häzirki zaman ýolunda möhüm orny eýeleýär.

Mundan başga-da, taraplar Hazar deňzi – Gara deňiz halkara üstaşyr ulag geçelgesiniň ösdürilmegi bilen baglanyşykly meseleleri, şol sanda Türkmenbaşy, Baku, Poti, Batumi we Konstansa portlary arkaly ýük daşamaklygy artdyrmagyň mümkinçiliklerini ara alyp maslahatlaşdylar. Ýewropa Bileleşigi bilen birlikde ähli gyzyklanýan taraplar bilen hyzmatdaşlygy işjeňleşdirmegiň möhümdigi bellenildi.