Türkmenistanda 2025-nji ýylda ýurduň eksport mümkinçiliklerini artdyrmaga we sebitde energetika hyzmatdaşlygyny pugtalandyrmaga gönükdirilen nebitgaz infrastrukturasynyň iri desgalary ulanyşa berildi.

Tamamlanyp barýan ýylyň 18-nji iýulynda Prezident Serdar Berdimuhamedow sanly ulgam arkaly Türkmenbaşydaky nebiti gaýtadan işleýän zawodlar toplumynyň düzümine girýän Kenar toplaýjy-ýükleýji nebit kärhanasynyň nebit we nebit önümleri guýulýan üçünji gämi duralgasynyň dabaraly açylyşyna gatnaşdy. Desganyň kuwwaty ýylda 2 million 60 müň tonna nebit we nebit önümlerini ýüklemäge we 1 million 150 müň tonna nebit we nebit önümlerini kabul etmäge mümkinçilik berýär.

Şu ýyl şeýle hem Türkmenistan — Owganystan — Pakistan — Hindistan (TOPH) gaz geçirijisiniň taslamasynyň çäginde Serhetabat — Hyrat gaz geçirijisiniň nobatdaky tapgyryna badalga berildi. Türkmenistanyň Halk Maslahatynyň Başlygy Gahryman Arkadagymyz dabarada ägirt uly uglewodorod serişdeleriniň ätiýaçlygynyň ýurda tebigy gazy uzak möhletli esasda eksport etmäge mümkinçilik berýändigini we gaz geçirijiniň taslamasynyň sebit döwletleriniň doganlyk halklarynyň abadançylygynyň bähbidine laýyk gelýändigini belläp geçdi.

Oktýabr aýynda Türkmenistanyň Söwda-senagat edarasynyň binasynyň "Türkmengaz" we "Türkmennebit" Döwlet konsernleriniň guramagynda "Türkmenistanyň nebiti we gazy — 2025" atly XXX halkara maslahaty we sergi geçirildi. Foruma dünýäniň onlarça ýurdundan wekiller gatnaşdylar. "Energetika geçişiniň esasy hökmünde çig mal serişdeleri: maýa goýumlary üçin täze gözýetimler" atly bölümçesinde maýa goýumlar we innowasiýalar arkaly energetika we nebithimiýa pudaklaryny döwrebaplaşdyrmak meseleleri ara alnyp maslahatlaşyldy.

Türkmenistanda işleýän öňdebaryjy halkara nebitgaz kompaniýalarynyň ýolbaşçylary türkmen kompaniýalary bilen uzak möhletli hyzmatdaşlygy ýola goýmak we taslamalary durmuşa geçirmek meselelerinde tejribe paýlaşdylar.