Halkymyzyň baýramçylyk ruhunda belläp geçýän hemişelik Bitaraplygynyň şanly 30 ýyllygy hem-de Halkara Bitaraplyk güni ýurdumyzyň ähli künjeginde uly şatlyga beslenýär. Bu şanly senä öz zähmet sowgatlaryny taýýarlan iri senagat toplumlarynyň biri hem «Türkmennebit» döwlet konsernidir.
Ýurdumyzyň iň iri önümçilik-hojalyk ulgamlarynyň biri hökmünde bellige alnan bu konsern berkarar Watanymyzyň çäklerinde nebit-gaz ýataklaryny gözlemekde we senagat taýdan özleşdirmekde ägirt uly işleri alyp barýar. «Türkmenistanyň nebitgaz senagatyny ösdürmegiň 2030-njy ýyla çenli Maksatnamasynda» bellenen wezipeleriň üstünlikli ýerine ýetirilmeginde, aýratyn-da, Balkan welaýatyndaky önümçilik düzümleriniň hyzmaty bellenilmäge mynasypdyr.
Hünärmenleriň belleýşine görä, öňdebaryjy kärhanalaryň hatarynda konserniň «Nebitgazburawlaýyş» tresti aýratyn orun eýeleýär. Golaý günlerde trestiň zähmet toparlary Hazar deňziniň kenarýaka zolagyndaky Uzynada käninde üç sany guýynyň gazuwyny tamamlap, olar boýunça ulanyşa tabşyryş işlerini üstünlikli ýerine ýetirdiler. Bu üstünlikler hemişelik Bitaraplygymyzyň 30 ýyllygyna uly zähmet sowgady boldy.
«Goturdepe» buraw işleri müdirliginiň 72-nji we 86-njy ulanyş guýulary bir gije-gündizde, degişlilikde, 44 hem-de 43 tonna gaz kondensatyny berýär. Şeýle hem Ekerem buraw işleri müdirliginiň Uzynada käninde burawlanan, taslama çuňlugy 6800 metr bolan 87-nji ulanyş guýusy gündelik 45 tonnadan gowrak gaz kondensatynyň alnyşyny üpjün edýär. Bu önümli guýular tehniki taýýarlyk işlerinden soň «Nebitgazçykaryş» trestiniň «Gumdagnebit» müdirligine tabşyryldy.
Guýularyň gazuwlarynda hormatly Prezidentimiziň Hytaý Halk Respublikasyndan satyn alyp beren «ZJ70DB» kysymly döwrebap buraw desgalarynyň ulanylmagy öndürijiligi has-da artdyrdy. Bu enjamlar diňe bir önümiň möçberini ýokarlandyrmak bilen çäklenmän, pudagyň ösüşine hem uly itergi berdi. Ýokary depgin bilen alnyp barylýan işler hünärmenleriň geljekde has-da uly sepgitlere ýetjekdiklerine ynamy pugtalandyrýar.
Döwrebap tehnologiýalar, kuwwatly buraw desgalary we döredilen oňat şertler hormatly Prezidentimiziň we türkmen halkynyň Milli Lideri Gahryman Arkadagymyzyň üns-aladasynyň netijesi bolup durýar. Zähmetsöýer hünärmenler bu mümkinçilikler üçin Gahryman Arkadagymyza we Arkadagly Gahryman Serdarymyza tükeniksiz minnetdarlyk we hoşallyk bildirýärler.
