Ýagşygeldi Kakaýew adyndaky Halkara nebit we gaz uniwersitetinde 2026-njy ýylyň oktýabr aýynyň 24-31 aralygynda Hytaý Halk Respublikasynyň Sian nebit uniwersitetiniň we Hebeý nebit hünär-tehniki uniwersitetiniň professor-mugallymlary myhman bolýarlar. Hytaýly mugallymlar uniwersitetiň «Lu Ban ussahanasynda» pedagoglar we talyp-ýaşlar üçin okuw sapaklaryny geçýärler.

Sapaklar 2024-nji ýylyň 18-nji oktýabrynda Hytaý Halk Respublikasynyň Sian şäherinde gol çekilen özara düşünişmek hakynda Ähtnamanyň çäklerinde guraldy. Resminama Ýagşygeldi Kakaýew adyndaky Halkara nebit we gaz uniwersiteti, Sian nebit uniwersiteti, Hebeý nebit hünär-tehniki uniwersiteti, Hytaýyň milli nebitgaz korporasiýasy we Hytaýyň bilim ulgamynda halkara alyş-çalyş assosiasiýasy tarapyndan gol çekildi. Türkmenistandaky Lu Ban ussahanasy 2026-njy ýylyň 16-njy aprelinde uniwersitetiň çäginde dabaraly ýagdaýda açyldy.

Sapaklaryň maksady mugallymlaryň hünär ussatlygyny we pedagogik başarnyklaryny ýokarlandyrmak, Türkmenistandaky «Lu Ban ussahanasynyň» durnukly ösüşini üpjün etmek, ugurdaş ýokary okuw mekdepleriniň tejribesini öwrenmekden ybarat. Mundan başga-da, bilim ulgamynyň hünärmenleriniň arasynda amaly hyzmatdaşlygy ösdürmek we çuňlaşdyrmak, hyzmatdaşlygyň geljegi uly ugurlaryny ara alyp maslahatlaşmak göz öňünde tutulýar.

Uniwersitetde ýurdumyzyň ylym-bilim ulgamynda halkara hyzmatdaşlygy ösdürmek üçin giň mümkinçilikleri döredip berýän türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa we Türkmenistanyň Prezidenti Serdar Berdimuhamedowa tüýs ýürekden minnetdarlyk bildirildi.