«Türkmengaz» döwlet konserniniň Medeni-işewürlik merkeziniň «Galkynyş» folklor toparynyň çeper ýolbaşçysy, Türkmenistanyň at gazanan sungat işgäri Allaberdi Nazarow toparyň Türkmenistanyň Garaşsyzlygynyň öňde boljak 35 ýyllygyna görýän taýýarlygy barada gürrüň berdi. Onuň sözlerine görä, topar ýubileý mynasybetli daşary ýurt dillerinde aýdymlary hem-de tanslary öwrenýär; olar milli çykyşlar bilen utgaşdyrylyp, daşary ýurtly myhmanlar üçin ýerine ýetiriler.
Nazarow toparyň her baýramçylyga hem-de halkara bäsleşiklere giň gerimli taýýarlyk görýändigini, welaýatlarda we paýtagtda, şeýle-de daşary ýurtlarda geçirilýän döwlet çärelerinde yzygiderli çykyş edýändigini belledi. Mysal üçin, şu ýylyň aprel aýynda topar Mary welaýatynyň Ýolöten etrabynda «Galkynyş» gaz käniniň düýbüni tutmak dabarasyna gatnaşdy. Dabaranyň başynda topar Hytaý Halk Respublikasynyň Döwlet Geňeşiniň Premýeriniň birinji orunbasary Din Sýuesýany «Türkmen-hytaý dostlugy» aýdymy bilen garşylady, dabaranyň ahyrynda bolsa «Alkyşnama» aýdymyny ýerine ýetirdi. «Türkmen-hytaý dostlugy» aýdymynyň sözleri Türkmenistanyň at gazanan medeniýet işgäri, şahyr Nurgözel Gözliýewa degişli bolup, sazyny Baky Dolyýew ýazdy. Topar nebitgazçylaryň zähmetine bagyşlanan başga aýdymlary hem ýerine ýetirýär. Hususanda, «Zor oglan», «Nebitgazly Watanym», «Nebitim bar, gazym bar, baky bahar ýazym bar» hem-de «Alkyşnamalar».
Ansambl üç ýaş toparyny — kiçi ýaşly çagalaryň, orta hem-de uly ýaşlylaryň toparlaryny özünde jemleýär. Uly ýaşlylaryň topary daşary ýurt sahnalarynda birnäçe gezek ansambla wekilçilik etdi, çagalar topary bolsa welaýatlarda we Aşgabatda geçirilýän döwlet çärelerinde hem-de festiwallarda çykyş edýär.
Nazarowyň gürrüň bermegine görä, «Galkynyş» folklor topary halkara bäsleşiklerde birnäçe gezek baýrakly orunlaryň eýesi boldy: hususan-da, 2020-nji ýylda topar Türkiýede geçirilen «Altyn Garagöz» bäsleşiginde baýrakly orna mynasyp boldy, şeýle hem Gazagystanda, Azerbaýjanda, Täjigistanda, Russiýada hem-de beýleki birnäçe ýurtda çykyş etdi. Topar Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşikde birnäçe gezek ýeňiji boldy.
Çeşme: «Nebit-gaz» gazeti
