«Türkmennebit» döwlet konserniniň Balkan welaýatyndaky «Nebitgazdüýpliabatlaýyş» trestiniň «Gamyşlyja» guýulary düýpli abatlaýyş müdirligi geçen hasabat döwründe önümçilik görkezijilerini birnäçe esse artdyrmagy başardy.

Abatlaýjylaryň yhlasly zähmeti netijesinde önüm bermesini kemelden guýularyň göz öňünde tutulan 30-synyň deregine 39-sy gaýtadan dikeldilip, ulanyşa tabşyryldy we meýilnama 130 göterim ýerine ýetirildi. Bu geçirilen işler nebitçilere goşmaça 33 müň tonna golaý nebit almaga mümkinçilik berdi — bu zähmet görkezijisi bellenilen meýilnamadan 3 esse köpdür.

Nebit çykarmakdan başga-da, müdirlik boýunça gaz çykarmaklygyň meýilnamasy hem birnäçe esse artyk ýerine ýetirildi. Bu üstünlikler kärhanany konserniň düzümindäki öňdebaryjylaryň birine öwürdi.