Ýagşygeldi Kakaýew adyndaky Halkara nebit we gaz uniwersitetiniň ýöriteleşdirilen kafedralary bilen «Türkmennebit» döwlet konserniniň «Nebitgazylmytaslama» institutynyň arasynda döredilen nebitgaz we himiýa tehnologiýasy önümçilik kafedrasy institutyň binýadynda işini netijeli alyp barýar.

Geljekki ýaş hünärmenleri taýýarlamakda ylmyň, tehnikanyň we tehnologiýanyň häzirki zaman ösen derejesinde we ylmy esaslarda bilim bermeklige eýerip, pudaklaýyn okuw mekdepleriniň talyplarynyň, ýaş mugallymlarynyň we aspirantlarynyň «Nebitgazylmytaslama» institutynda alnyp barylýan giň ugurly ylmy-barlag işlerine gatnaşmaklaryny gazanmak wajypdyr.

Şu meseläniň çäklerinde açylan önümçilik kafedrasy döredilenden bäri geçen bäş ýyldan gowrak döwrüň içinde talyplara ylmy esasda bilim berilmegi bilen, önümçilik başarnyklarynyň ösdürilmeginiň utgaşykly guralmagy arkaly önümçilik amallaryna ylmy nukdaýnazardan talyplary taýýarlamakda ähmiýetli tejribe-nazary binýatly kämilleşdiriş ulgamy ýola goýuldy.

Sebitde hereket edýän nebitgaz ugurly ylym-bilim ojaklarynyň zehinli ýaş hünärmenlerini, talyplaryny ylma işjeň çekmek «Nebitgazylmytaslama» institutynyň binýadynda hereket edýän önümçilik kafedrasynyň baş maksady bolup, institutyň barlaghanalarynda geçirilýän tejribe-synag, analitik ylmy-barlag işlerine talyplarda höwes döretmegiň çäklerinde okuw mekdebinde göçme sapaklaryň guralmagy talyplaryň ylmy-barlag işlerine gyzyklanmalarynyň çuňlaşmagyna itergi berýär.

Halkara parahatçylyk we ynanyşmak ýylynda Türkmenistanyň Magtymguly adyndaky Ýaşlar guramasynyň Merkezi Geňeşi bilen Türkmenistanyň Ylymlar akademiýasynyň bilelikde guramagynda zehinli ýaşlaryň arasynda alymlaryň täze neslini ýüze çykarmaga, ylmyň dürli ugurlary boýunça barlaglary höweslendirmäge gönükdirilen bäsleşikde sebitiň ylym-bilim ojaklaryndan birnäçe hünärmenlerdir talyplaryň, ýagny «Nebitgazylmytaslama» institutyndan bir hünärmeniň, uniwersitetiň Balkanabat bölüminden bir mugallymyň we bir talybyň, Balkanabat nebitçilik orta hünär okuw mekdebinden bir talybyň ýeňiji bolmagy bu ugurda çekilýän azabyň ýerine düşýändigini aýdyň görkezýär.

«Şu ýylyň alty aýynda «Nebitgazylmytaslama» institutynyň barlaghanalaryna uniwersitetiň Balkanabat bölüminiň nebit senagaty fakultetiniň dürli hünärdäki, ýagny nebitiň we gazyň geologiýasy, nebitgaz geçirijilerini we nebitgazyň saklanýan ýerlerini taslamak, gurmak, we ulanmak, nebitgaz guýularyny burawlamak, nebitgaz känlerini özleşdirmek we ulanmak hem-de nebiti, gazy gaýtadan işlemegiň himiki tehnologiýasy ýaly hünärler boýunça okaýan talyplary göçme tejribelik sapaklarynda boldular. Şeýle hem dürli ugurlarda bilim alýan talyplar özleriniň okuw ýylynyň dowamynda guralýan önümçilik tejribeliklerini institutyň degişli barlaghanalarynda geçip, ylmy-barlag işleriniň dowamynda ýerine ýetirilýän laboratoriýa-analitik seljermeleriň, desgalaryň taslama işleriniň many-mazmuny bilen içgin tanyşýarlar» diýip, Ýagşygeldi Kakaýew adyndaky Halkara nebit we gaz uniwersitetiniň Balkanabat bölüminiň nebitgaz we himiýa tehnologiýasy önümçilik kafedrasynyň müdiri Maýagözel Annataganowa ýürek buýsanjyny paýlaşýar.

Serdarmuhammet Izimow,

«Türkmennebit» DK-nyň «Nebitgazylmytaslama» institutynyň laboratoriýa müdiri

Çeşme: "Nebit-gaz" gazeti