Türkmen halky kitaba uly hormat goýup, ony gymmatly hazyna deňeýär. Gahryman Arkadagymyzyň ýiti zehininden, jöwher paýhasyndan dörän eserler giň halk köpçüligi, ähli ýaşdaky adamlar üçin gymmatlydyr. Milli Liderimiziň täze ýazyp tamamlan «Hakyda göwheri» atly eseriniň elimize gowuşmagy hem bütin il-ulsumyzyň göwün guşuna ganat berdi.
Çeper döredijilige gadyr goýýan hormatly Arkadagymyzyň şöhratly taryhymyz hakynda «Hakyda göwheri» diýen kitabyny ýazyp tamamlamagy «Pähim-paýhas ummany Magtymguly Pyragy» ýylynyň ýatdan çykmajak wakalarynyň biridir. Bu eserde Gündogaryň beýik akyldary Magtymguly Pyragynyň döreden eserleriniň adamzat gymmatlyklaryna ýetiren täsiri, şöhratly taryhymyz, medeniýetimiziň dünýä siwilizasiýasyna goşan goşandy baradaky gymmatly maglumatlaryň beýan edilmegi onuň ähmiýetini artdyrýar.
2024-nji ýylyň Türki medeniýetiň halkara guramasy – TÜRKSOÝ tarapyndan «Türki dünýäsiniň beýik şahyry we akyldary Magtymguly Pyragy ýyly», Änew şäheriniň «Türki dünýäsiniň medeni paýtagty» diýlip yglan edilmegi halkymyz üçin buýsançly hakykata öwrüldi. Halkymyzyň döreden maddy hem ruhy gymmatlyklarynyň, keremli topragymyzyň taryhy ýadygärlikleriniň ÝUNESKO-nyň abraýly sanawlaryna goşulmagy şanly ýylyň şatlygyny has-da artdyrdy. Munuň özi berkarar döwletimizde taryhy gymmatlyklarymyzy, edebi mirasymyzy öwrenmek, dünýä ýaýmak boýunça amala aşyrylýan asylly işleriň halkara derejedäki ykrarnamasydyr. Gahryman Arkadagymyzyň belleýşi ýaly, şöhratly geçmiş taryhymyzy indiki nesillere ýetirmek häzirki nesilleriň borjudyr.
Gahryman Arkadagymyzyň täze eseri türkmen halkynyň taryhyna has giňişleýin garamaga, milli özboluşlylygy, däp-dessurlary, durmuş ýörelgeleri bilen tanyşmaga, halkymyzyň dünýäniň ylmy, ykdysady, medeni ösüşine goşan saldamly goşandyna düşünmäge mümkinçilik berýär. Milli Liderimiziň «Hakyda göwheri» atly eseri halkymyzyň şöhratly geçmişinden, bagtyýar şu gününden, ajap eýýamymyzda amala aşyrylýan beýik işlerden röwşen geljege uzaýan döwletlilik ýolumyza ýagty saçýan şamçyragdyr. Hormatly Arkadagymyzyň ajaýyp eserleriniň höwri köp bolsun!
Begnazar GADAMOW,
Ýagşygeldi Kakaýew adyndaky Halkara nebit we gaz uniwersitetiniň mugallymy.
«Türkmen sporty» gazeti.
07.12.2024 ý. №49.
