Aşgabatda geçirilýän «Türkmenistanyň gurluşyk, senagat, himiýa we energetika pudaklaryny ösdürmek» atly halkara maslahatyň we serginiň («CIET-2026») çäklerinde Türkmenistanyň döwlet edaralary bilen daşary ýurt kompaniýalarynyň arasynda özara düşünişmek hakynda 15 sany halkara resminamasyna gol çekildi. Bu barada çäräni guraýjylar habar berdiler.

Resminamalar Beýik Britaniýa, Gazagystan, Şweýsariýa, Germaniýa, Hytaý, Ýaponiýa, Malaýziýa, Slowakiýa, Daniýa we Koreýa Respublikasy ýaly dünýäniň 10 ýurdunyň 14 iri kompaniýasy bilen baglaşyldy. Gol çekilen ylalaşyklar önümçiligiň we infrastruktura taslamalarynyň giň toplumyny öz içine alýar.

Gurluşyk we binagärlik ministrligi şähergurluşyk we seýsmiki durnukly tehnologiýalar boýunça Beýik Britaniýanyň «ZHA Architects Limited», Gazagystanyň «FALTEC» we Şweýsariýanyň «Leica Geosystems AG» kompaniýalary bilen resminamalara gol çekdi. Senagat we gurluşyk önümçiligi ministrligi Germaniýanyň hamala Hytaýyň bäş sany kompaniýasy bilen hyzmatdaşlyk barada ylalaşdy. Şol bir wagtda Energetika ministrligi Hytaýyň «TBEA» hem-de Ýaponiýanyň «Sumitomo Corporation» kompaniýalary bilen ähtnamalara gol çekdi, Awtomobil ýollary ministrligi bolsa Slowakiýanyň «Betamont s.r.o» we Şweýsariýanyň «Leica Geosystems AG» kompaniýalary bilen hyzmatdaşlygy ýola goýdy.

Şeýle hem «Türkmenhimiýa» döwlet konserni Daniýanyň «Topsoe A/S» kompaniýasy bilen Ahal welaýatyndaky benzin zawody hem-de «Garabogazkarbamid» kärhanasynyň ygtybarly işlemegini üpjün etmek boýunça, Günorta Koreýanyň «Samsung E&A Co., Ltd» kompaniýasy bilen bolsa himiýa senagatyny ösdürmek barada ylalaşyk gazandy. Mundan başga-da, Malaýziýanyň «Bitdeer Supply Chain SDN. BHD.» kompaniýasy Türkmenistanyň üç sany ministrligi bilen bilelikdäki ähtnama gol çekdi.

Ýatladyp geçsek, 60 ýurtdan 800-den gowrak wekili bir ýere jemlän «CIET-2026» halkara sergisi we maslahaty paýtagtymyz Aşgabatda 3–5-nji noýabr aralygynda öz işini dowam etdirýär.