Aşgabatda Owganystanyň Söwda-senagat we maýa goýum edarasynyň ýolbaşçylaryndan ybarat wekiliýet bilen Türkmenistanyň Söwda-senagat edarasynyň wekilleriniň duşuşygy geçirildi. Owgan wekiliýeti paýtagtymyza Türkmenistanyň Söwda-senagat edarasynyň resmi çakylygy boýunça geldi. Owganystanyň Söwda-senagat we maýa goýum edarasynyň welaýatlaryň meseleleri boýunça orunbasary Faiz Ahmad Hawafi iki ýurduň hususy pudaklary boýunça hyzmatdaşlygyň ugurlarynyň arasynda nebitgaz pudagyny hem-de energetikany birinji orunda goýdy.

Faiz Ahmad Hawafi Türkmenistanyň Söwda-senagat edarasynda geçirilen resmi duşuşyga gatnaşdy we edaranyň wekilleriniň, türkmen täjirleriniň, senagatçylarynyň hem-de maýadarlarynyň öňünde çykyş etdi. Saparyň maksady iki ýurduň arasyndaky söwda-ykdysady gatnaşyklary giňeltmekden hem-de sebit hyzmatdaşlygyny pugtalandyrmakdan ybarat boldy.

Iki ýurduň arasyndaky taryhy dostluk hem-de ykdysady gatnaşyklar barada durup geçen Faiz Ahmad Hawafi Owganystan bilen Türkmenistanyň arasyndaky söwda gatnaşyklarynyň diňe bir adaty söwda-satuw bilen çäklenmän, bilelikdäki maýa goýumlara, bilelikdäki kärhanalary döretmäge, uzak möhletli şertnamalary baglaşmaga hem-de amaly ykdysady taslamalary durmuşa geçirmäge geçmelidigini nygtady. Ol nebitgaz pudagyndan we energetikadan başga-da, hyzmatdaşlygyň esasy ugurlarynyň hatarynda senagaty, dag-magdan pudagyny, oba hojalygyny, ulagy, demir ýollary, üstaşyr daşamalary, logistikany hem-de ammar hojalygyny görkezdi.

Duşuşygyň dowamynda Faiz Ahmad Hawafi 100 türkmen täjirini, senagatçysyny hem-de maýadaryny ykdysady wekiliýetiň düzüminde Owganystana baryp, ýurduň maýa goýum mümkinçilikleri bilen şahsy taýdan tanyşmaga resmi taýdan çagyrdy.

Çykyşyny jemläp, ol iki ýurduň kompaniýalarynyň arasynda göni işewür gatnaşyklary giňeltmegiň, söwda wekiliýetlerini alyş-çalyş etmegiň hem-de bilelikdäki taslamalara amaly taýdan ýardam bermegiň zerurdygyny belledi.