Türkmenistanyň Prezidenti Serdar Berdimuhamedow Balkan welaýatynda açylan Medeniýet hepdeligine gatnaşyjylara Gutlag iberdi.
Döwlet Baştutanymyz medeniýet milletimiziň mertebesidigini, bahasyna ýetip bolmajak ruhy baýlygydygyny belledi. Şoňa görä-de, Arkadagly Gahryman Serdarymyzyň aýtmagyna görä, medeniýeti we sungaty ösdürmek döwlet syýasatynyň ileri tutulýan ugurlarynyň biri hökmünde kesgitlenildi. Ýurdumyzyň döredijilik kuwwatyny artdyrmakda medeniýet ulgamyna uly orun degişlidir.
Türkmenistanyň Prezidenti Serdar Berdimuhamedow täze taryhy döwürde aýdym-saz, şekillendiriş we amaly-haşam, teatr, kino sungatyny ösdürmek, köpçülikleýin habar beriş serişdeleriniň, muzeýleriň, kitaphanalaryň, medeniýet öýleriniň, medeni aň-bilim edaralarynyň işini kämilleşdirmek, olara sanly ulgamy giňden ornaşdyrmak ugrunda alnyp barylýan toplumlaýyn işlere ünsi çekdi. Teatrlarda görkezilýän sahna oýunlary, kinoteatrlardaky çeper filmleriň görkezilişleri, medeniýet öýlerinde geçirilýän döredijilik duşuşyklary bagtyýar halkymyza döwrebap medeni hyzmatyň guralýandygyny aýdyň görkezýär.
«Türkmen medeniýetini, sungatyny we edebiýatyny ösdürmekde ýurdumyzda yzygiderli geçirilmegi asylly däbe öwrülen Medeniýet hepdeliginiň uly ähmiýeti bardyr. Balkan welaýatynda öz işine başlaýan Medeniýet hepdeliginiň hem türkmen medeniýetiniň köpöwüşginliligini ähli ajaýyplygy bilen açур görkezmäge ýardam etjekdigine ynanýaryn. Biz ýazyjy-şahyrlaryň, bagşy-sazandalaryň, artistleriň, suratkeşleriň bu sungat baýramçylygyna täzeden-täze döredijilik sowgatlary bilen gelýändiklerine örän guwanýarys» diýip, Arkadagly Gahryman Serdarymyz Gutlagynda ýazdy.
Şunda Türkmenistanyň Prezidenti Balkan topragynda türkmen edebiýatynyň we sungatynyň ösmeginde uly hyzmatlary bitiren ençeme meşhur aýdymçy-sazandalaryň, edebiýat we sungat ussatlarynyň kemala gelendigini aýtdy.
Gutlagynyň soňunda Döwlet Baştutanymyz Balkan welaýatynda Medeniýet hepdeliginiň dabaraly açylmagy mynasybetli ýene-de bir gezek tüýs ýürekden gutlady we bu sungat baýramçylygyna gatnaşyjylaryň ählisine berk jan saglyk, bagtyýarlyk, döredijilik üstünliklerini arzuw etdi.
