Halkara Parahatçylyk we Ynanyşmak Ýyly
Döwrebap tehnikalar gelip gowuşdy
28.08.2025

Berkarar döwletiň täze eýýamynyň Galkynyşy döwründe hormatly Prezidentimiziň tagallalary bilen ýurdumyzyň nebitgaz pudagyny döwrebaplaşdyrmak, ösdürmek, oňa täze tehnikalary hem-de tehnologiýalary ornaşdyrmak işleri giň gerime eýe bolýar. «Türkmennebit» döwlet konserniniň «Nebitgazdüýpliabatlaýyş» trestiniň Awtoulag we ýöriteleşdirilen tehnikalar müdirligine gelip gowşan onlarça kuwwatly desgalar hem munuň aýdyň güwäsidir.

Pudagyň edara-kärhanalarynyň tehniki binýadynyň pugtalandyrylmagy ýurdumyzyň sebitlerinde täze, baý tebigy nebit hem-de gaz gorly ýataklaryň açylmagyny, bar bolanlarynda abatlaýyş işleriniň geçirilmegini, mawy ýangyjyň möçberiniň artdyrylmagyny, önümleriň gaýtadan işleniliş derejesiniň halkara ülňülere laýyk getirilmegini şertlendirýär. Täze tehnikalar önüm bermesini kemelden ýa-da bütinleý bes eden guýularda düýpli abatlaýyş işlerini ýokary hilli amala aşyrmaga giň mümkinçilik bermek bilen birlikde, olaryň kömegi arkaly guýynyň içinde emele gelen käbir çylşyrymly ýagdaýlary aradan aýyrmak hem mümkin bolar. Bu tehnikalar arkaly düýpli abatlaýşa garaşýan guýulary hem öz wagtynda dikeldip, ulanyşa tabşyrmak üstünlikli ýola goýulýar.

Awtoulag we ýöriteleşdirilen tehnikalar müdirligine ýakynda gelip gowşan, Hytaýyň önümi bolan TY-160 kysymly 5 sany zynjyrly traktorlar bolsa «gara altyndyr» mawy ýangyjyň möçberini artdyrmakda ýakyndan ýardam berjek täze tehnikalaryň nobatdaky tapgyrydyr. Bu tehnika ygtybarlylygy hem-de ulanylyşynyň aňsatlygy bilen tapawutlanyp, dürli howa we önümçilik şertlerinde işlemäge ukyplydyr. Ol ýol gurluşygynda, oba hojalygynda hem-de gazylyp alynýan peýdaly baýlyklaryň çykarylmagynda giňden ulanylýar.

Häzirki wagtda kuwwatly tehnikalar «Goturdepe» we «Barsagelmez» känlerine ugradyldy. Täze tehnikalary buýsanç bilen kabul eden nebitçiler halal hem-de yhlasly zähmet çekip, ýurdumyzyň gülläp ösüşine mynasyp goşant goşmaga döredip beren mümkinçilikleri üçin Gahryman Arkadagymyza hem-de Arkadagly Gahryman Serdarymyza tüýs ýürekden çykýan hoşallyklaryny bildirdiler.

çeşme: turkmenmetbugat.gov.tm