Ýewropa Bileleşiginiň we Germaniýanyň Halkara hyzmatdaşlyk boýunça jemgyýetiniň (GIZ) strategik taslamasynyň çäklerinde Türkmenistanyň energetika pudagynyň we ylmy jemgyýetçiliginiň wekilleri Klaustal tehnologiýa uniwersitetinde (Germaniýa Federatiw Respublikasy) halkara ylmy-barlag tejribeligini geçýärler. Maksatnama şu ýylyň 25-nji iýulyndan 16-njy awgusty aralygynda amala aşyrylýar we gaýtadan dikeldilýän energetika, metan zyňyndylaryny azaltmak hem-de senagata emeli intellekti ornaşdyrmak babatda häzirki zaman tehnologiýalaryny öwrenmäge gönükdirilendir.
Türkmen wekiliýetiniň düzümine Türkmenistanyň Energetika ministrliginiň, Türkmenistanyň Döwlet energetika institutynyň, Ýagşygeldi Kakaýew adyndaky Halkara nebit we gaz uniwersitetiniň, «Türkmengaz» döwlet konserniniň Ylmy-barlag tebigy gaz institutynyň wekilleri, şeýle hem «Türkmengaz» döwlet konserniniň hünärmenleri girdi.
Üç hepdelik maksatnamanyň dowamynda gatnaşyjylar emeli aňyň we maşyn öwrenişiniň esaslaryny, maglumatlary işläp taýýarlamagyň hem-de derňemegiň usullaryny, neýron ulgamlaryny gurmagy we senagat önümçiliginde sanly tehnologiýalary ulanmagyň amaly taraplaryny öwrenýärler. Nebitgaz guýularynyň bitewiligini üpjün etmek, ugrukdyrylan burawlaýyş tehnologiýalary, metan syzmalaryny ýüze çykarmak, şeýle hem fotoelektrik desgalarynyň netijeliligini çaklamak üçin emeli aňyň algoritmlerini ulanmak meselelerine aýratyn üns berilýär.
Maksatnamanyň çäklerinde Germaniýanyň iri senagat kärhanalaryna, şol sanda kükürtli gazy gaýtadan işleýän zawoda we gaýtadan dikeldilýän energetika desgalaryna baryp görmek hem göz öňünde tutulýar. Alnan bilimleri we amaly tejribäni Türkmenistanyň Döwlet energetika institutynyň hem-de Ýagşygeldi Kakaýew adyndaky Halkara nebit we gaz uniwersitetiniň bilim we ylmy-barlag işinde ulanmak meýilleşdirilýär.
Şeýle halkara taslamalarynyň durmuşa geçirilmegi ýurdumyzyň ylmy kuwwatynyň ösmegine, energetika pudagyna innowasion tehnologiýalaryň ornaşdyrylmagyna hem-de Türkmenistanyň «ýaşyl» ykdysadyýet we durnukly ösüş babatdaky strategik maksatlaryna ýetmegine ýardam edýär.
