Türkmenistanyň zähmetsöýer gallaçylary Watan harmanyna 1 million 400 müň tonnadan gowrak bugdaý hasylyny tabşyryp, şertnamalaýyn borçnamalaryny üstünlikli berjaý etdiler. Bu gazanylan üstünlik «Garaşsyz, baky Bitarap Türkmenistan — bedew batly at-myradyň mekany» ýylynyň taryhy ähmiýetli wakalarynyň üstüni ýetirdi.

Gahryman Arkadagymyzyň ýurdumyzyň oba hojalyk pudagyny toplumlaýyn ösdürmek boýunça başlangyçlary häzirki wagtda Türkmenistanyň Prezidenti serdar Berdimuhamedowyň baştutanlygynda üstünlikli durmuşa geçirilýär. Gallaçylaryň öndürijilikli zähmet çekmegi üçin döwletimiz tarapyndan döredilýän zerur şertler munuň aýdyň beýanydyr. Arkadagly Gahryman Serdarymyzyň edermen gallaçylara we ähli oba hojalyk işgärlerine iberen Gutlagynda belleýşi ýaly, eziz Diýarymyzda bugdaýyň bol hasyly ýetişdirilip, gazanylan bu ajaýyp zähmet ýeňşinde ýurdumyzyň gallaçylyk bilen meşgullanýan öňdebaryjy daýhan birleşikleriniň, daýhan hojalyklarynyň, hususy önüm öndürijileriniň we ähli oba zähmetkeşleriniň mynasyp goşandy bardyr.

Oba hojalygy milli ykdysadyýetimiziň möhüm pudaklarynyň biridir. Bu pudak azyk bolçulygyny üpjün etmek bilen bir hatarda, Türkmenistanyň eksport mümkinçiliklerini artdyrmaga-da ýardam berýär. Pudagy ylmy esasda toplumlaýyn ösdürmäge gönükdirilen işleriň netijesinde täze sepgitlere ýetilýär. Şunuň bilen baglylykda, Türkmenistanyň Oba hojalyk ministrliginiň Ylmy-barlag däneçilik instituty tarapyndan bugdaýyň «Serdar», «Arkadag», «Pyragy» atly täze görnüşleriniň döredilendigini nygtamak gerek. Munuň özi bugdaýyň hasyllylygyny ep-esli artdyrmaga ýardam etdi.

Diýarymyzda ýetişdirilen bugdaý hasylyny ýygnamak, talabalaýyk saklamak we gaýtadan işlemek üçin ähli mümkinçilikler döredilýär. Şunuň bilen baglylykda, oba hojalygyna gönükdirilýän uly möçberdäki maýa goýumlaryň hasabyna ähli welaýatlarda galla kabul ediş kärhanalary, döwrebap elewatorlar, ammarlar, degirmen toplumlary üstünlikli hereket edýär. Bu bolsa ýetişdirilen hasylyň öz wagtynda we ýokary hilli gaýtadan işlenmegini üpjün edýär. Şeýle-de munuň özi Türkmenistanyň dürli künjeklerinde hereket edýän häzirki zaman degirmenlerinde taýýarlanylýan unuň hiliniň ýokary halkara görkezijilere laýyk bolmagyny üpjün edýär.

Galla oragy möwsüminde tohumy saýlap almakdan başlap, hasyly ýygnamak işlerine çenli bugdaý önümçiliginiň ähli tapgyrlarynda agrotehniki çäreleriň ýokary hilli geçirilmegine aýratyn üns berildi. Türkmenistanyň Prezidenti Serdar Berdimuhamedowyň oba hojalyk toplumynyň ösdürilmegine berýän goldawy netijesinde galla oragy möwsüminde «John Deere», «СLAAS» ýaly meşhur kompaniýalaryň häzirki zaman galla orujy kombaýnlary netijeli ulanyldy. Ýokary öndürijilikli tehnikalar ýetişdirilen bol hasyly çalt we ýitgisiz ýygnamaga ýardam berdi.

Şeýlelikde, gallaçy daýhanlarymyzyň gazanan zähmet ýeňşi Türkmenistanyň Prezidenti Serdar Berdimuhamedowyň baştutanlygynda ýurdumyzda azyk bolçulygyny has-da pugtalandyrmak, halkymyzyň bagtyýar durmuşyny üpjün etmek boýunça amala aşyrylýan giň gerimli işleriň üstünliklere beslenýändiginiň nobatdaky aýdyň beýany boldy.